چیف جسٹس یحییٰ آفریدی، چیف جسٹس امین الدین خان کی روس میں عالمی قانونی فورم میں شرکت

روس کے تاریخی شہر سینٹ پیٹرز برگ میں جاری 14 ویں ‘سینٹ پیٹرز برگ انٹرنیشنل لیگل فورم’ (ILF) 2026 میں پاکستان کی اعلیٰ عدالتی قیادت نے باضابطہ طور پر شرکت کی ہے۔ سپریم کورٹ آف پاکستان کے چیف جسٹس، جسٹس یحییٰ آفریدی اور وفاقی آئینی عدالت (Federal Constitutional Court) پاکستان کے چیف جسٹس، جسٹس امین الدین خان نے روس میں متعین پاکستانی سفیر فیصل نیاز ترمذی کے ہمراہ اس عالمی قانونی فورم میں ملک کی نمائندگی کی۔

اس مقتدر عالمی فورم میں دنیا کے مختلف ممالک سے تعلق رکھنے والے چیف جسٹس صاحبان، نامور ججز، ممتاز قانونی ماہرین، حکومتی نمائندگان اور بین الاقوامی اداروں کے اعلیٰ سطح کے وفود شریک ہیں۔ فورم کے دوران عالمی سطح پر انصاف کی فوری فراہمی، قانون کی حکمرانی (Rule of Law)، پیچیدہ آئینی امور اور بین الملکتی قانونی تعاون کو مزید فروغ دینے جیسے اہم موضوعات پر تفصیلی تبادلہ خیال کیا جا رہا ہے۔ پاکستانی عدالتی قیادت کی اس فورم میں موجودگی پاکستان اور روس کے مابین بڑھتے ہوئے ادارہ جاتی روابط، دوطرفہ قانونی تعاون اور عالمی سطح پر عدالتی مکالمے کے فروغ کی اہمیت کو واضح کرتی ہے۔