پاکستان کی پرو ہاکی لیگ میں لگاتار 14ویں شکست، انگلینڈ نے بھی ہرا دیا

ایف آئی ایچ (FIH) پرو ہاکی لیگ میں قومی کھیل کے زوال کا سلسلہ برقرار ہے، جہاں پاکستان ہاکی ٹیم کو ایونٹ میں لگاتار 14ویں شکست کا سامنا کرنا پڑا ہے۔ لندن میں کھیلے گئے پرو ہاکی لیگ کے ایک اہم میچ میں بھارت کے ہاتھوں عبرتناک شکست کے بعد اب میزبان انگلینڈ نے بھی گرین شرٹس کو ہرا دیا۔ انگلش ٹیم نے اعصاب شکن مقابلے کے بعد پاکستانی ٹیم کو 2 کے مقابلے میں 1 گول سے شکست دی۔

میچ کے دوران پاکستانی فارورڈز نے حریف گول پوسٹ پر کئی حملے کیے، تاہم ٹیم کی جانب سے واحد گول رانا وحید اشرف ہی اسکور کرنے میں کامیاب ہو سکے۔ اس مایوس کن کارکردگی کے باعث پاکستان ٹیم اب تک ٹورنامنٹ میں ایک پوائنٹ بھی حاصل کرنے میں ناکام رہی ہے اور پوائنٹس ٹیبل پر آخری نمبر پر موجود ہے۔ شیڈول کے مطابق پاکستان ٹیم کا اگلا میچ 26 جون کو اپنے روایتی حریف بھارت کے خلاف ہوگا، جہاں گرین شرٹس ایونٹ میں اپنی پہلی جیت اور پوائنٹس حاصل کرنے کے لیے میدان میں اترے گی۔