خیبر پختونخوا فنانس بل میں نئے ٹیکس عائد، جرمانوں میں بڑا اضافہ

خیبر پختونخوا حکومت نے نئے مالی سال 2026-27 کے لیے صوبائی فنانس بل کثرتِ رائے سے منظور کر لیا ہے، جس کے تحت صوبائی سطح پر محصولات بڑھانے کے لیے نئے ٹیکس عائد کرنے کے ساتھ ساتھ جرمانوں اور سزاؤں میں نمایاں اضافہ کیا گیا ہے۔ منظور شدہ فنانس بل کے مطابق، صوبائی حکومت نے آئندہ مالی سال کے دوران مختلف شعبوں سے 182 ارب روپے سے زائد کا ریکارڈ ٹیکس جمع کرنے کا ہدف مقرر کیا ہے۔

نئے فنانس بل کی سب سے اہم خصوصیت یہ ہے کہ اس میں صوبے کی تاریخ میں پہلی مرتبہ کرپٹو کرنسی اور دیگر ڈیجیٹل اثاثوں (Digital Assets) کی خرید و فروخت اور آمدن پر 5 فیصد ٹیکس عائد کرنے کی انقلابی تجویز شامل کی گئی ہے۔ اس کے علاوہ، ٹیکس نیٹ کو دستاویزی بنانے کے لیے پی او ایس (POS) اور ای-انوائسنگ سسٹم نہ لگانے والے تاجروں پر جرمانے کی رقم 2 لاکھ روپے سے یکمشت بڑھا کر 5 لاکھ روپے کر دی گئی ہے۔ فنانس بل کے تحت ٹرانسپورٹ کے شعبے کو بھی ٹیکس کے دائرے میں لایا گیا ہے، جس کے مطابق مسافر گاڑیوں پر ٹیکسوں کے ڈھانچے میں اہم ردوبدل کرتے ہوئے رکشوں، وینز اور بسوں کے لیے نئی سالانہ ٹیکس شرح مقرر کی گئی ہے۔

ٹیکس چوری اور رجسٹریشن سے بچنے والے عناصر کے خلاف بل میں انتہائی سخت سزائیں تجویز کی گئی ہیں۔ کسی بھی کاروبار کو متعلقہ ٹیکس اتھارٹی کے ساتھ رجسٹرڈ نہ کرانے کی صورت میں 4 لاکھ روپے جرمانہ یا ایک سال قید کی سزا دی جا سکے گی۔ بل میں ٹیکس فراڈ کو سنگین جرم قرار دیتے ہوئے 5 لاکھ روپے جرمانہ، 5 سال تک قید اور واجب الادا ٹیکس کے 100 فیصد کے برابر اضافی جرمانے کی کڑی شق شامل کی گئی ہے۔ مزید برآں، کاروباری لین دین بینکنگ چینل کے بجائے نقد (کیش) کرنے پر 50 ہزار روپے جرمانہ اور 6 ماہ تک قید کی سزا تجویز کی گئی ہے۔ نئے مالی قوانین کے مطابق صوبے میں ٹیکس نظام کو جدید خطوط پر استوار کرتے ہوئے مزید سخت اور ڈیجیٹل بنایا جا رہا ہے تاکہ محصولات میں ریکارڈ اضافہ اور مالیاتی نظام میں شفافیت کو یقینی بنایا جا سکے