آزاد کشمیر میں بدامنی پھیلانے والے 572 شرپسند گرفتار، پولیس اہلکار کی لاش پر رقص کیا گیا، چیف سیکرٹری اور آئی جی پولیس کی پریس کانفرنس

آزاد جموں و کشمیر کے چیف سیکرٹری اور انسپکٹر جنرل (آئی جی) پولیس لیاقت علی ملک نے ایک ہنگامی اور انتہائی اہم پریس کانفرنس کرتے ہوئے انکشاف کیا ہے کہ ریاست میں جائز مطالبات تسلیم کیے جانے کے باوجود کالعدم جوائنٹ ایکشن کمیٹی نے مخصوص بیرونی ایجنڈے کے تحت نہ صرف امن و امان کو شدید نقصان پہنچایا بلکہ عوام کو وفاق اور ریاستی اداروں کے خلاف مسلح کارروائیوں کے لیے اکسایا۔ حکام نے واضح کیا ہے کہ آزاد کشمیر میں امن برقرار رکھنا حکومت کی اولین ترجیح ہے اور قانون ہاتھ میں لینے والے اب تک 572 شرپسندوں کو حراست میں لیا جا چکا ہے۔چیف سیکرٹری نے بتایا کہ آٹے اور بجلی کی قیمتوں پر عوامی ہمدردی حاصل کرنے کی کوشش کی گئی۔ حکومت نے تمام قابلِ عمل اور جائز مطالبات پورے کیے۔ یہاں تک کہ حکومتِ پاکستان نے ریاست کی مالی ضروریات کو پورا کرنے کے لیے 20 سے 25 ارب روپے فراہم کیے، تاہم ایڈوانس انکم ٹیکس کا خاتمہ تسلیم نہیں کیا جا سکتا تھا کیونکہ اس سے اربوں روپے کا قومی نقصان ہو رہا تھا۔انہوں نے انکشاف کیا کہ کالعدم جوائنٹ ایکشن کمیٹی نے مطالبات پورے ہونے کے باوجود احتجاج کا راستہ چنا اور لوگوں تک باقاعدہ اسلحہ پہنچایا۔ کمیٹی کی جانب سے اعلانات کیے گئے کہ “ہم اسلام آباد پر بھی لشکر کشی کریں گے”۔ اس دوران سامان کی ترسیل کرنے والے ٹرکوں کو جلایا گیا اور مہاجرین کی 12 نشستوں کو بلاجواز احتجاج کا بہانہ بنایا گیا۔مظفرآباد اور میرپور ریجن کے غیور عوام نے شرپسندوں کا ساتھ دینے سے انکار کرتے ہوئے انتظامیہ سے بھرپور تعاون کیا اور دھرنا دینے والوں سے لاتعلقی کا اظہار کیا۔

آئی جی آزاد کشمیر لیاقت علی ملک نے بتایا کہ راولاکوٹ میں ایک بڑے اور ہولناک حادثے کی باقاعدہ پلاننگ کی گئی تھی۔ فرائض پر مامور ایک پولیس اہلکار کو بے دردی سے شہید کیا گیا اور “شہید کی لاش پر رقص کیا گیا”۔اسلام آباد پولیس کے ایک اہلکار کا شناختی کارڈ دیکھ کر اسے شدید تشدد کا نشانہ بنایا گیا اور پاک فوج کے شہداء کے خلاف انتہائی نامناسب اور غیور قوم کے لیے ناقابلِ برداشت زبان استعمال کی گئی۔آئی جی نے سوال اٹھایا کہ “لوگوں کی گردنیں کاٹ کر لاشیں منگلا ڈیم سے ملنے کی دھمکیاں دینا، سرکاری ملازمین کو اغوا کرنا اور بھارتی سفارت خانے کے سامنے پاکستان کا پرچم جلانا کس طرح کا عوامی مسئلہ ہے؟” یہ چند مخصوص شرپسندوں کا مسلح جتھہ ہے جو خالصتاً ریاست کے خلاف مورچہ بند ہے۔ان شرپسند حملوں کے نتیجے میں اب تک آزاد کشمیر پولیس کے 4 جوان شہید اور 97 اہلکار شدید زخمی ہو چکے ہیں۔ پولیس نے کارروائی کرتے ہوئے پولیس اہلکاروں کو شہید کرنے والے مرکزی ملزمان سمیت 572 افراد کو گرفتار کر لیا ہے۔