گلگت بلتستان اسمبلی: سپیکر و ڈپٹی سپیکر منتخب، پی پی اور آئی پی پی میں حکومت سازی پر اتفاق

گلگت بلتستان کی سیاست میں ایک بڑی آئینی اور سیاسی پیش رفت سامنے آئی ہے، جہاں نو منتخب اسپیکر عمران ندیم نے اپنے عہدے کا حلف اٹھا لیا ہے، جبکہ مسلم لیگ (ن) کے ملک کفایت الرحمان بلا مقابلہ ڈپٹی اسپیکر منتخب ہو گئے ہیں۔ اس کے ساتھ ہی خطے میں نئی حکومت سازی کے لیے سیاسی جوڑ توڑ اور اتحاد قائم کرنے کا عمل بھی تیز ہو گیا ہے۔

گلگت بلتستان اسمبلی کے افتتاحی اجلاس میں پہلے 30 ارکان نے بطور رکن اسمبلی حلف اٹھایا۔ جس کے بعد نو منتخب اسپیکر عمران ندیم نے اپنے عہدے کا حلف اٹھایا۔ بعد ازاں، اسپیکر عمران ندیم نے بلا مقابلہ منتخب ہونے والے مسلم لیگ (ن) کے ڈپٹی اسپیکر ملک کفایت الرحمان سے ان کے عہدے کا حلف لیا۔ دوسری جانب وفاقی سطح پر سیاسی سرگرمیاں تیز ہو گئی ہیں اور پاکستان پیپلز پارٹی (PPP) کے چیئرمین بلاول بھٹو زرداری اور استحکامِ پاکستان پارٹی (IPP) کے صدر عبدالعلیم خان کے درمیان ایک اہم ٹیلی فونک رابطہ ہوا ہے۔ اس گفتگو میں دونوں رہنماؤں نے گلگت بلتستان میں مل کر مخلوط حکومت بنانے پر مکمل اتفاق کیا۔ استحکامِ پاکستان پارٹی نے گلگت بلتستان میں وزیراعلیٰ کے اہم ترین انتخاب کے لیے پیپلز پارٹی کے امیدوار کی غیر مشروط حمایت کا باقاعدہ اعلان کر دیا ہے۔ آئی پی پی کے سینیئر رہنما عون چوہدری کے مطابق، استحکامِ پاکستان پارٹی گلگت بلتستان کی نئی بننے والی کابینہ کا باقاعدہ حصہ ہو گی۔ انہوں نے واضح کیا کہ کابینہ کی تشکیل، محکموں کی تقسیم اور دیگر وزارتی امور دونوں جماعتوں کی باہمی مشاورت اور مروجہ فارمولے کے تحت طے کیے جائیں گے۔