جائیداد کے دستاویزات کے حصول کیلئے بائیو میٹرک تصدیق لازم کرنے کا فیصلہ

حکومتِ پنجاب نے جائیداد کی منتقلی اور دستاویزات کی تیاری میں شفافیت لانے اور جعل سازی کے خاتمے کے لیے بائیو میٹرک تصدیق کو لازمی قرار دینے کا فیصلہ کر لیا ہے۔ اس سلسلے میں “رجسٹریشن ایکٹ 2026ء” کا مسودہ حتمی منظوری کے لیے گورنر پنجاب کو ارسال کر دیا گیا ہے۔پنجاب اسمبلی نے جمعرات کو کثرتِ رائے سے اس بل کی منظوری دی، جس کے بعد اب اسے قانونی شکل دینے کے لیے گورنر کے دستخط کا انتظار ہے۔ اس بل کے ذریعے ایک صدی سے زائد پرانے “رجسٹریشن ایکٹ 1908ء” میں اہم ترامیم کی جائیں گی اور بائیو میٹرک تصدیق کی خصوصی شق کو ایکٹ کا حصہ بنایا جائے گا۔ بل کے متن کے مطابق، جائیدادوں کے ساتھ ساتھ جن دیگر اشیاء کی رجسٹریشن قانونی طور پر لازم ہے، ان کے لیے فریقین کی بائیو میٹرک تصدیق اب ناگزیر ہوگی۔ نئے قانون کے تحت پنجاب لینڈ ریکارڈ اتھارٹی (PLRA) کو ایک جدید “الیکٹرانک ریکارڈ سسٹم” تشکیل دینے کی ذمہ داری سونپی گئی ہے۔ اس سسٹم کے ذریعے نہ صرف ریکارڈ کو محفوظ بنایا جائے گا بلکہ شہریوں کو جائیداد کے دستاویزات کے حصول میں آسانی ہوگی اور پٹوار کلچر کے خاتمے میں مدد ملے گی۔ ماہرین کا ماننا ہے کہ اس اقدام سے جائیداد کے تنازعات اور قبضے کے کیسز میں نمایاں کمی آئے گی۔