خواتین کیلئے محفوظ پنجاب میری اولین ترجیح ہے، مریم نواز

وزیراعلیٰ پنجاب مریم نواز شریف نے عزم ظاہر کیا ہے کہ ان کی حکومت کی اولین ترجیح خواتین کے لیے ایک ایسا محفوظ پنجاب بنانا ہے جہاں ہر خاتون کسی بھی خوف، ہراسانی یا بدسلوکی کے بغیر مکمل تحفظ اور اعتماد کے ساتھ گھر سے باہر نکل سکے۔ لاہور کالج فار ویمن یونیورسٹی کے کانووکیشن سے خطاب کرتے ہوئے انہوں نے اس بات پر فخر کا اظہار کیا کہ پنجاب کی پہلی خاتون وزیراعلیٰ کا تعلق اسی مادرِ علمی سے ہے، اور واضح کیا کہ معاشرے کی ترقی خواتین کی شمولیت کے بغیر ممکن نہیں ہے۔ مریم نواز نے اپنی عملی زندگی اور سیاست کے سفر کا تذکرہ کرتے ہوئے کہا کہ اگرچہ انہوں نے کبھی سیاست میں آنے کا نہیں سوچا تھا، لیکن آج وہ خود اور ان کی ٹیم میں شامل مریم اورنگزیب اور عظمیٰ بخاری جیسی خواتین، سیاست اور حکومتی امور میں ہراول دستے کا کردار ادا کر رہی ہیں۔

وزیراعلیٰ نے طالبات کو مخاطب کرتے ہوئے کہا کہ ڈگری کا حصول عملی زندگی کے ایک نئے سفر کا آغاز ہے اور وہ نوجوانوں کو درپیش چیلنجز سے بخوبی آگاہ ہیں۔ انہوں نے خواتین کے تحفظ کے حوالے سے سخت پیغام دیتے ہوئے کہا کہ اگر کسی خاتون کے ساتھ زیادتی، ہراسانی یا بے حرمتی کا واقعہ پیش آیا تو وہ اس وقت تک چین سے نہیں بیٹھیں گی جب تک مجرموں کو قانون کے کٹہرے میں نہیں لایا جاتا۔ ان کا کہنا تھا کہ صوبے کے کئی اہم اداروں کی سربراہی اب خواتین کے پاس ہے جو اس بات کا ثبوت ہے کہ خواتین ہر میدان میں اپنی صلاحیتوں کا لوہا منوا رہی ہیں اور حکومت ان کی ترقی کے لیے ہر ممکن عملی اقدامات کرتی رہے گی۔