امیر جماعت اسلامی کا مہنگائی کے خلاف تحریک اور ہڑتال کا اعلان: 15 مئی کو اسلام آباد میں بڑا احتجاج ہوگا

امیر جماعت اسلامی حافظ نعیم الرحمن نے پریس کانفرنس کرتے ہوئے ملک میں بڑھتی ہوئی مہنگائی کے خلاف تحریک کا اعلان کر دیا ہے اور واضح کیا ہے کہ جماعت اسلامی کے پاس ہڑتال اور پہیہ جام کا آپشن بھی موجود ہے۔ انہوں نے حکومت پر کڑی تنقید کرتے ہوئے کہا کہ بجلی اور گیس پر فکس چارجز اور 200 یونٹ والے صارفین کی سبسڈی ختم کرنا غریب دشمنی ہے، جس کی وجہ سے ملک میں شرح غربت 40 فیصد اور پنجاب میں 41 فیصد تک پہنچ گئی ہے۔ حافظ نعیم الرحمن نے شریف خاندان کو اس “لوٹ مار” کا ذمہ دار قرار دیتے ہوئے کہا کہ آئی پی پیز (IPPs) کے ساتھ معاہدوں میں کرپشن کے لیے توسیع کی جا رہی ہے اور سولر صارفین کو بھی لوٹا جا رہا ہے۔

انہوں نے پیٹرولیم مصنوعات کی قیمتوں پر بات کرتے ہوئے کہا کہ عالمی مارکیٹ کے مطابق قیمت 271 روپے بنتی ہے، لیکن 117 روپے لیوی اور دیگر ٹیکسز لگا کر عوام کو 401 روپے میں پیٹرول فروخت کیا جا رہا ہے، جو کہ سراسر ظلم ہے۔ امیر جماعت اسلامی نے مزید کہا کہ ایک طرف عوام خودکشیوں پر مجبور ہیں تو دوسری طرف حکمران اربوں روپے کے اشتہارات، مہنگے جہاز اور گاڑیاں خرید رہے ہیں۔ انہوں نے اعلان کیا کہ جماعت اسلامی عید کے بعد مہنگائی کے خلاف بڑی کال دینے جا رہی ہے اور 15 مئی کو اسلام آباد میں بڑا احتجاج کیا جائے گا۔ انہوں نے ملک کے اڑھائی کروڑ بائیک سواروں سے بھی اپیل کی کہ وہ پرامن طریقے سے سڑکیں بند کر کے اس تحریک کو مؤثر بنائیں۔