وزیراعظم کا خوشحال گڑھ پل پر دہشت گردی ناکام بنانے والے شہید لیاقت کو خراجِ تحسین

وزیراعظم محمد شہباز شریف نے پنجاب اور خیبرپختونخوا کے سرحدی علاقے جنڈ اور خوشحال گڑھ پل (کوہاٹ) کے قریب دہشت گردی کی ایک بڑی سازش کو اپنی جان پر کھیل کر ناکام بنانے والے بہادر شہری لیاقت کو زبردست خراجِ تحسین پیش کیا ہے۔ وزیراعظم نے اپنے بیان میں کہا کہ ایک ذمہ دار پاکستانی کی حیثیت سے لیاقت نے مشتبہ شخص کی شناخت پوچھ کر اسے روکا، جس پر دہشت گرد نے خود کو دھماکے سے اڑا لیا۔ اس واقعے میں لیاقت نے جامِ شہادت نوش کیا، لیکن ان کی اس بروقت جرأت اور فرض شناسی نے علاقے کو ایک بڑے جانی نقصان سے بچا لیا۔

وزیراعظم شہباز شریف نے شہید لیاقت کو “قومی اثاثہ” اور “حب الوطنی کی اعلیٰ مثال” قرار دیتے ہوئے کہا کہ ایسے نڈر شہری دہشت گردی کے خلاف قومی عزم کی حقیقی علامت ہیں۔ انہوں نے اس عزم کا اعادہ کیا کہ پوری قوم اپنی سکیورٹی فورسز کے ساتھ مل کر دشمن کے ناپاک عزائم کو خاک میں ملاتی رہے گی اور قومی اتحاد کے ذریعے اس ناسور کو جڑ سے اکھاڑ پھینکا جائے گا۔ وزیراعظم نے شہید کے درجات کی بلندی اور سوگوار خاندان کے لیے صبرِ جمیل کی دعا بھی کی۔