بنوں حملہ: پاکستان کا افغان ناظم الامور کو طلب کر کے شدید احتجاج، ڈی مارش کر دیا

پاکستان نے بنوں میں پولیس پوسٹ پر ہونے والے دہشت گرد حملے کے خلاف افغان ناظم الامور کو وزارتِ خارجہ طلب کر کے شدید احتجاج ریکارڈ کرایا ہے۔ ترجمان دفترِ خارجہ کے مطابق، افغان سفارت کار کو ایک سخت احتجاجی مراسلہ (Demarche) تھمایا گیا، جس میں 9 مئی 2026 کو خیبر پختونخوا کے ضلع بنوں کی فتح خیل پولیس پوسٹ پر ہونے والے بزدلانہ خودکش حملے کی مذمت کی گئی۔ اس حملے میں 15 پولیس اہلکار شہید اور ایک شہری سمیت 4 افراد زخمی ہوئے تھے۔

تحقیقاتی شواہد: وزارتِ خارجہ نے واضح کیا کہ واقعے کی تفصیلی تحقیقات، جمع کردہ شواہد اور تکنیکی انٹیلی جنس سے ثابت ہوتا ہے کہ اس حملے کا ماسٹر مائنڈ افغانستان میں مقیم دہشت گرد تھا۔

بھرپور جواب کا حق: پاکستان نے افغان سرزمین کے مسلسل استعمال پر گہری تشویش کا اظہار کرتے ہوئے واضح کیا کہ وہ اس وحشیانہ کارروائی کے ذمہ داروں کے خلاف بھرپور اور فیصلہ کن جوابی کارروائی کا حق محفوظ رکھتا ہے۔

بین الاقوامی رپورٹس: افغان فریق کو باور کرایا گیا کہ افغانستان میں دہشت گرد تنظیموں کی موجودگی اور انہیں ملنے والا سازگار ماحولاقوامِ متحدہ کی مانیٹرنگ ٹیم اور دیگر عالمی اداروں کی رپورٹس میں دستاویزی طور پر ثابت شدہ ہے۔: پاکستان نے افغان طالبان حکومت سے مطالبہ کیا کہ وہ اپنی سرزمین کسی دوسرے ملک کے خلاف استعمال نہ ہونے دینے کے عزم کو پورا کرے اور فتنہ الخوارج، فتنہ ہندوستان اور داعش جیسے عناصر کے خلاف ٹھوس اور قابلِ تصدیق کارروائی کرے۔پاکستان نے دوٹوک موقف اختیار کیا ہے کہ اگر افغان طالبان حکومت ان دہشت گرد تنظیموں کو پناہ دینا جاری رکھتی ہے، تو پاکستان اپنی قومی سلامتی اور شہریوں کے تحفظ پر کسی صورت سمجھوتہ نہیں کرے گا۔