فضائیہ نے دشمن کے 8طیارے گرائے، بھارتی حملے پر ردعمل سنہرے حروف سے لکھاجائے گا، صدرزرداری

صدر مملکت آصف زرداری نےکہا ہےکہ 10 مئی پاکستان کی تاریخ کا سنہری باب ہے، بھارتی جارحیت پر پاکستان کا ردعمل سنہرے حروف سے لکھا جائےگا۔ پاک فضائیہ نے دشمن کے 8 طیارے مارگرائے

آپریشن بنیان مرصوص معرکہ حق کا ایک سال مکمل ہونے پر اسلام آباد میں پاکستان مونومنٹ پر خصوصی تقریب ہوئی۔

تقریب میں وزیر اعظم شہباز شریف سمیت فیلڈ مارشل سید عاصم منیر اور مسلح افواج کے سربراہان، اسپیکر قومی اسمبلی، چیئرمین سینیٹ اور وفاقی وزرا بھی شریک ہوئے۔ مختلف ممالک کے سفیر، سول اورعسکری حکام، شہدا کے لواحقین بھی تقریب میں موجود تھے۔

تقریب کے آغاز پر قومی ترانہ بجایا گیا۔ تینوں مسلح افواج کے چاق و چوبند دستوں نے مارچ پاسٹ کیا اور سلامی پیش کی۔

تقریب سے مرکزی خطاب کرتے ہوئے صدر مملکت کا کہنا تھا کہ  پہلگام  واقعےکے بعد پاکستان  پر جنگ  مسلط کی گئی، بھارت نے پاکستان  پر بلا اشتعال حملہ کیا، بھارت نے پاکستان کی سول آبادی  اور عبادت گاہوں پر حملے کیے، پاک فضائیہ اور پاک فوج نے بھارتی جارحیت کا منہ توڑ جواب دیا۔

صدر مملکت کا کہنا تھا کہ  افغانستان کےذریعے پاکستان میں ہونے والی بھارتی دہشت گردی کو ختم ہونا چاہیے۔