آٹھ صفر کا معرکہ حق دشمن کبھی فراموش نہیں کر پائے گا: مریم نواز

وزیراعلیٰ پنجاب مریم نواز شریف نے کہا ہے کہ ‘آٹھ صفر’ کا معرکہ حق ایک ایسی تاریخی فتح ہے جسے دشمن کبھی فراموش نہیں کر پائے گا۔ انہوں نے وزیراعظم محمد شہباز شریف، فیلڈ مارشل عاصم منیر، ایئر چیف مارشل بابر ظہیر اور ایڈمرل نوید اشرف کو خراجِ تحسین پیش کرتے ہوئے کہا کہ اس معرکے نے دنیا پر پاکستان کی ہیبت اور حربی برتری کا نشان ثبت کر دیا ہے۔

مریم نواز نے اپنے پیغام میں کہا کہ معرکہ حق نے یہ ثابت کر دیا کہ ہم امن پسند قوم ہیں، لیکن ضرورت پڑنے پر “بنیان المرصوص” بن کر اپنی سرحدوں کا دفاع کرنا بھی جانتے ہیں۔ انہوں نے مزید کہا کہ اس فتح کی بنیاد ایک بے باک قیادت نے رکھی، جس نے پاک افواج اور عوام کے اتحاد کے ذریعے دشمن کو سر جھکانے پر مجبور کر دیا۔

وزیراعلیٰ کا کہنا تھا کہ آج پورا پاکستان، خصوصاً پنجاب کے گلی کوچوں میں طلبہ، اساتذہ، تاجر اور کسان اس عظیم کامیابی کا جشن منا رہے ہیں۔ انہوں نے واضح کیا کہ پاکستان کے شاہینوں نے اپنی پیشہ ورانہ مہارت کے ذریعے دشمن سے اپنی برتری کا لوہا منوایا ہے اور یہ کامیابی تاریخِ عالم میں پاکستان کی عظمت کے ایک نئے باب کے طور پر ہمیشہ یاد رکھی جائے گی۔