پاکستان اپنی خودمختاری پر کبھی سمجھوتہ نہیں کرے گا: ملک محمد احمد خان

سپیکر پنجاب اسمبلی ملک محمد احمد خان نے کہا ہے کہ 10 مئی محض ایک جنگی فتح کا دن نہیں بلکہ یہ پاکستان کی آزادی، خودمختاری اور سالمیت کے تحفظ کی علامت بن چکا ہے۔ لاہور میں میڈیا سے گفتگو کرتے ہوئے انہوں نے ‘معرکہ حق’ کی پہلی سالگرہ پر پوری قوم کو مبارکباد پیش کی اور کہا کہ آج ہر پاکستانی کا سر فخر سے بلند ہے۔

ملک محمد احمد خان نے وزیراعظم شہباز شریف، آرمی چیف جنرل عاصم منیر، ایئر چیف اور نیول چیف کی مشترکہ قیادت کو خراجِ تحسین پیش کرتے ہوئے کہا کہ پہلگام واقعے سے لے کر آپریشن “بنیان المرصوص” تک پاکستان نے بہترین جنگی و سفارتی حکمت عملی کا مظاہرہ کیا۔ انہوں نے کہا کہ بھارت پہلگام واقعے پر ایک سال گزرنے کے باوجود کوئی ثبوت پیش نہیں کر سکا، جبکہ بلاول بھٹو زرداری نے عالمی سطح پر بھارتی بیانیے کو بے نقاب کرنے میں کلیدی کردار ادا کیا۔