او آئی سی کا فلسطینی علاقوں پر قبضے کے خاتمے، دو ریاستی حل کو آگے بڑھانے کا مطالبہ

او آئی سی نے فلسطینی علاقوں پر اسرائیلی قبضے کے خاتمے اور دو ریاستی حل کو آگے بڑھانے کے لیے فوری عالمی اقدامات کا مطالبہ کر دیا ہے۔ اقوام متحدہ کے ہیڈ کوارٹرز میں ہونے والے ایک اہم اجلاس کے دوران او آئی سی کی جانب سے بیان دیتے ہوئے ترکیے کے مستقل مندوب نے خبردار کیا کہ مسلسل تشدد اور سیاسی تعطل کے باعث مسئلہ فلسطین ایک انتہائی نازک مرحلے پر پہنچ چکا ہے۔اجلاس میں اس بات پر زور دیا گیا کہ فلسطین کے مسئلے اور مشرقِ وسطیٰ کے بحرانوں کے حل کے لیے اب محض بیانات نہیں بلکہ عملی اقدامات کی ضرورت ہے، کیونکہ اس تنازع کے عالمی امن اور سلامتی پر گہرے اثرات مرتب ہو رہے ہیں۔یہ خصوصی اجلاس مقبوضہ مغربی کنارے اور مشرقی یروشلم کی سنگین صورتحال پر غور کے لیے بلایا گیا تھا، جس کا انعقاد اقوام متحدہ کی سلامتی کونسل کے متعدد رکن ممالک بشمول برطانیہ اور فرانس کے تعاون سے کیا گیا۔ سفیرِ ترکیہ نے واضح کیا کہ عالمی برادری کی خاموشی خطے میں عدم استحکام کو مزید ہوا دے رہی ہے۔