مسلم لیگ ن نے گلگت بلتستان انتخابات کے لیے 19 امیدواروں کو پارٹی ٹکٹ جاری کر دیے

پاکستان مسلم لیگ ن نے گلگت بلتستان انتخابات کے لیے اپنے امیدواروں کو پارٹی ٹکٹ جاری کر دیے ہیں۔

صدر مسلم لیگ ن میاں نواز شریف کے دستخطوں سے 19 امیدواروں کو ٹکٹ جاری کیے گئے۔ جاری کردہ فہرست میں گلگت، اسکردو ، دیامر، غذر، استور، شگر، کھرمنگ اور ہنزہ سمیت مختلف حلقوں کے امیدوار شامل ہیں۔

پارٹی کی جانب سے جاری فہرست کے مطابق گلگت ون سے شفیق الدین، گلگت ٹو سے حافظ الرحمان جبکہ گلگت تھری سے محمد اقبال کو امیدوار نامزد کیا گیا ہے۔ اسی طرح ہنزہ سے میر غضنفر علی خان اور اسکردو کے مختلف حلقوں سے محمد اکبر خان، امتیاز حیدر خان اور اجمل حسین کو ٹکٹ جاری کیے گئے ہیں۔

دیامر، غذر اور استور کے حلقوں کے لیے بھی پارٹی امیدواروں کے ناموں کی منظوری دی گئی ہے۔ پارٹی قیادت نے امیدواروں کو انتخابی مہم بھرپور انداز میں چلانے کی ہدایت کی ہے۔