معاشی استحکام کیلئے کیپٹل مارکیٹ کا مضبوط ہونا ناگزیر ہے: وزیر خزانہ

وفاقی وزیر خزانہ محمد اورنگزیب نے کہا ہے کہ پائیدار ترقی کے لیے کیپٹل مارکیٹ کا استحکام اور نجی شعبے کی شمولیت انتہائی ضروری ہے۔ اسلام آباد میں منعقدہ تقریب سے خطاب کرتے ہوئے انہوں نے واضح کیا کہ حکومت کا بنیادی ہدف کرنٹ اکاؤنٹ کا استحکام اور مالیاتی نظم و ضبط کو برقرار رکھنا ہے۔ انہوں نے توانائی کے شعبے میں اصلاحات اور متبادل ذرائع (سولر، ونڈ، ہائیڈرو) پر توجہ دینے کے عزم کا اعادہ کیا تاکہ بیرونی جھٹکوں سے بچا جا سکے۔ وزیر خزانہ نے امریکہ اور ایران کے درمیان جاری کشیدگی پر تشویش کا اظہار کرتے ہوئے اسے عالمی معیشت کے لیے خطرہ قرار دیا اور کہا کہ پاکستان خطے میں امن کے لیے فعال کردار ادا کر رہا ہے۔