امریکی قبضے میں لیے گئے ایرانی جہاز کے 22ارکان بذریعہ پاکستان وطن واپس پہنچ گئے

امریکی تحویل میں لئے گئےایرانی جہاز کے عملے کے 22 ارکان پاکستان آنے کے بعد اپنے وطن واپس پہنچ گئے۔ایرانی سرکاری خبر رساں ادارے ارنا نے ایرانی جہاز توسکا کے عملے کی واپسی کی تصدیق کرتے ہوئے ان کی واپسی کی تصویر بھی جاری کردی۔

اطلاعات ہیں کہ انہیں بلوچستان اور سیستان کے راستے ایران واپس بھیج گیا ہے۔اس سے پہلے وزیر خارجہ اسحاق ڈار نےسوشل میڈیا پرایرانی عملے کی پاکستان آمد کی تصدیق کی تھی اور کہا تھا کہ عملے کو بھیجا جارہا ہے تاہم بحری جہاز کو مرمت کے بعد کمپنی کے حوالے کردیا جائے گا۔

اسحاق ڈار نے بتایا تھا کہ ان افراد کو گزشتہ رات بحفاظت پاکستان منتقل کیا گیا تھا ۔ اسحاق ڈار کے مطابق ایرانی بحری جہاز کو بھی ضروری مرمت کے بعد اس کے اصل مالکان کو واپس کرنے کے لیے پاکستانی سمندری حدود میں واپس لایا جا رہا ہے۔

انہوں نے کہا کہ یہ اقدامات ایرانی اور امریکی حکام کی حمایت سے کیے جا رہے ہیں اور یہ عمل اعتماد سازی کا ایک اہم اقدام ہے۔

نائب وزیراعظم نے کہا کہ پاکستان امریکا اور ایران کے لیے تحسین کا اظہار کرتا ہے اور علاقائی امن و سلامتی کے لیے بات چیت، سفارت کاری اور ثالثی میں سہولت فراہم کرنے کے لیے پُرعزم ہے۔