امریکی قونصل جنرل چارلس گڈمین کا ایس ایس یو ہیڈکوارٹرز کا دورہ

امریکی قونصل جنرل چارلس گڈمین نے کراچی میں اسپیشل سکیورٹی یونٹ (SSU) کے مختلف شعبہ جات کا دورہ کیا، جہاں انہوں نے ادارے کے بلند پیشہ ورانہ معیار کو سراہا۔ دورے کے دوران ڈی آئی جی سکیورٹی ڈاکٹر مقصود احمد سے ان کی ملاقات ہوئی، جس میں ڈی آئی جی نے اعلیٰ آپریشنل معیار اور بین الاقوامی شراکت داروں کے درمیان اسٹریٹجک تعاون کی اہمیت پر زور دیا۔ کمانڈنٹ ایس ایس یو عامر خان نیازی نے بریفنگ دیتے ہوئے بتایا کہ ایس ایس یو پاکستان کا پہلا آئی ایس او سرٹیفائیڈ پولیس یونٹ ہے جس کے کمانڈوز ہر طرح کی ہنگامی صورتحال سے نمٹنے کے لیے جدید تربیت یافتہ ہیں۔ اس موقع پر قونصل جنرل نے فارنرز سکیورٹی سیل کے اہلکاروں کو ان کی بہترین خدمات کے اعتراف میں تعریفی اسناد بھی پیش کیں۔