پاکستان سفارتی سطح پر بھی معرکہ حق میں کامیاب، امن کا علمبردار بن کر ابھرا: عطا تارڑ

وفاقی وزیر اطلاعات عطا اللہ تارڑ کا کہنا ہے کہ ایک سال گزرنے کے بعد حقائق مکمل طور پر واضح ہو چکے ہیں اور پاکستان نے سفارتی محاذ پر کامیابی حاصل کی ہے۔ انہوں نے کلبھوشن یادیو کی گرفتاری کا حوالہ دیتے ہوئے کہا کہ بھارت اس حقیقت سے بخوبی واقف ہے کہ وہ پاکستان کی حراست میں ہے۔ وزیر اطلاعات نے مزید کہا کہ وزیر اعظم شہباز شریف نے پی ایم اے کاکول میں اپنے خطاب کے دوران پہلگام واقعہ کی شفاف اور غیر جانبدارانہ تحقیقات کا مطالبہ کیا تھا، لیکن بھارت کی جانب سے اس پر کوئی ٹھوس جواب سامنے نہیں آیا۔ ان کا کہنا تھا کہ جہاں بھارت دہشت گردی کو فروغ دیتا ہے، وہیں پاکستان ایک ذمہ دار ریاست کے طور پر اس کے خلاف عملی جدوجہد کر رہا ہے۔