سینیٹ اجلاس: اپوزیشن لیڈر راجہ ناصر عباس کا امریکہ اور اسرائیل کی شکست کا جشن منانے کا مطالبہ، سیاسی قیدیوں کی رہائی کی اپیل

سینیٹ اجلاس کے دوران اظہارِ خیال کرتے ہوئے اپوزیشن لیڈر علامہ راجہ ناصر عباس نے امریکہ اور ایران کے درمیان جنگ بندی کو امریکہ کی اخلاقی اور عسکری شکست قرار دیتے ہوئے اس کا جشن منانے کا مطالبہ کیا ہے۔ انہوں نے کہا کہ امریکہ نے ایران پر حملے کے دوران تمام عالمی قوانین کی دھجیاں اڑائیں اور معصوم بچوں کو نشانہ بنا کر جنگ کا آغاز کیا، لیکن ایرانی قوم نے قیادت کی شہادتوں کے باوجود ثابت قدمی دکھائی اور دشمن کے منصوبوں کو خاک میں ملا دیا۔ ان کا کہنا تھا کہ امریکہ مذاکرات کی میز پر خوشی سے نہیں بلکہ مجبور ہو کر آیا ہے اور اس جنگ کو روکنے کے لیے جس نے بھی کردار ادا کیا وہ شکریے کا مستحق ہے۔

راجہ ناصر عباس نے ملکی صورتحال پر بات کرتے ہوئے زور دیا کہ عدل کے بغیر امن کا قیام ناممکن ہے اور پاکستان کو موجودہ بحرانوں سے نکالنے کا واحد راستہ قانون کی حکمرانی ہے۔ انہوں نے حکومت سے مطالبہ کیا کہ سیاسی قیدیوں کے ساتھ عزت و احترام کا رویہ اپنایا جائے اور شاہ محمود قریشی، عمر سرفراز چیمہ اور اعجاز چوہدری جیسے رہنماؤں کو رہا کیا جائے، کیونکہ وہ دہشت گرد نہیں ہیں۔ انہوں نے بانی پی ٹی آئی کے ساتھ انصاف کرنے پر زور دیتے ہوئے کہا کہ ملک کو آگے بڑھانے کے لیے بات چیت اور چیزوں کو درست کرنے کی ضرورت ہے۔ اپوزیشن لیڈر نے پاکستانی عوام کا بھی شکریہ ادا کیا جو ہر مشکل گھڑی میں مظلوموں کے ساتھ کھڑے رہے۔