ایران کی جانب بڑی امریکی فورس روانہ، جنگی بحری جہاز اور طیارے شامل

امریکی صدر ڈونلڈ ٹرمپ نے کہا ہے کہ امریکا نے ایک بڑی بحری اور فضائی فوجی طاقت ایران کی جانب روانہ کر دی ہے، تاہم اس کا یہ مطلب ہرگز نہیں کہ امریکا لازمی طور پر فوجی کارروائی کرے گا۔

ایئر فورس ون میں میڈیا نمائندگان سے گفتگو کرتے ہوئے صدر ٹرمپ نے بتایا کہ متعدد بحری جہاز اور فضائی اثاثے ایران کے قریب تعینات کیے جا رہے ہیں۔ ان کا کہنا تھا کہ یہ اقدام احتیاطی تدبیر کے طور پر کیا گیا ہے تاکہ صورتحال پر گہری نظر رکھی جا سکے۔

صدر ٹرمپ نے کہا کہ ایران کے اقدامات پر مسلسل نظر ہے، ہم دیکھ رہے ہیں کہ آگے کیا ہوتا ہے۔ انہوں نے دعویٰ کیا کہ ایران کو خبردار کیا گیا تھا کہ اگر پھانسیاں دی گئیں تو کارروائی کی جائے گی، جس کے بعد ایران نے پھانسیاں منسوخ کر دیں۔

امریکی صدر نے واضح کیا کہ اگر ایران بات چیت کرنا چاہتا ہے تو امریکا اس کے لیے تیار ہے، تاہم اگر ایران نے نیوکلیئر ہتھیار بنانے کی کوشش کی تو دوبارہ حملہ کیا جائے گا۔

عالمی امور پر بات کرتے ہوئے صدر ٹرمپ نے کہا کہ امریکا یوکرین جنگ کے خاتمے کے لیے سنجیدہ کوششیں کر رہا ہے، جبکہ گرین لینڈ کی سکیورٹی کے حوالے سے نیٹو کے ساتھ مل کر کام کیا جائے گا۔

انہوں نے یہ بھی بتایا کہ وہ اپریل میں چین کا دورہ کریں گے اور سال کے اختتام پر چینی صدر کے امریکا آنے کی توقع ہے۔