موسمیاتی تبدیلی کے اثرات: جنوبی پنجاب میں گندم کی پیداوارکم ہونےکا خدشہ

جنوبی پنجاب خصوصاً ملتان اور گردونواح میں غیر معمولی موسمیاتی تبدیلیوں کے باعث گندم کی فصل شدید متاثر ہو رہی ہے، جس کے نتیجے میں فی ایکڑ پیداوار میں نمایاں کمی کا خدشہ ظاہر کیا جا رہا ہے۔

محکمہ موسمیات کے مطابق مارچ کے دوران درجہ حرارت معمول سے 2.7 ڈگری سینٹی گریڈ زیادہ ریکارڈ کیا گیا، جو گندم کی فصل کے لیے نہایت حساس مرحلہ ہوتا ہے۔ اسی دوران درجہ حرارت میں اضافے کے باعث گندم کا سٹہ قبل از وقت نکل آیا، جس سے دانے کا سائز مکمل طور پر نشوونما نہ پا سکا۔

مزید برآں اپریل کے آغاز میں غیر متوقع بارشوں اور ژالہ باری نے جنوبی پنجاب کے تقریباً 2 لاکھ 10 ہزار ایکڑ رقبے پر کھڑی گندم کی فصل کو متاثر کیا۔

کسانوں کے مطابق موجودہ موسمی صورتحال کے باعث فی ایکڑ پیداوار 30 سے 35 من کے ہدف تک پہنچنا بھی مشکل دکھائی دے رہا ہے۔ کسان اس وقت بڑھتی ہوئی ڈیزل قیمتوں اور کٹائی کے اخراجات میں اضافے سے بھی شدید پریشان ہیں۔

زرعی ماہرین کے مطابق جنوبی پنجاب صوبے کی مجموعی گندم پیداوار کا تقریباً 70 فیصد فراہم کرتا ہے، اس لیے اس خطے میں فصل کی کمی ملک کی فوڈ سکیورٹی کے لیے تشویش کا باعث بن سکتی ہے۔

متاثرہ کسانوں نے حکومت سے فوری امداد اور نقصانات کے سروے کا مطالبہ کیا ہے۔