امریکی نائب صدر جے ڈی وینس کی سربراہی میں وفد پاکستان آئے گا، وائٹ ہاؤس کی تصدیق

ایران کے ساتھ جنگ بندی معاہدے کے مذاکرات کے لیے امریکی صدر ڈونلڈ ٹرمپ نے اعلیٰ سطح کا وفد پاکستان بھیجنے کا فیصلہ کرلیا ہے۔

عالمی خبر رساں ادارے کے مطابق وائٹ ہاؤس کی ترجمان نے میڈیا بریفنگ میں بتایا کہ صدر کی ہدایت پر وفد پاکستان روانہ ہو رہا ہے جہاں ایران کے ساتھ امن معاہدے پر مذاکرات ہوں گے۔

ترجمان نے کہا کہ پاکستان جانے والے امریکی وفد کی قیادت نائب صدر جے ڈی وینس کریں گے، جبکہ صدر کے خصوصی ایلچی اسٹیو وٹکوف اور مشیر جیرڈ کشنر بھی ٹیم میں شامل ہیں۔

کیرولین لیویٹ نے مزید کہا کہ نائب صدر وینس اس عمل میں کلیدی کردار ادا کرتے رہے ہیں اور اب وہ مذاکرات کے نئے مرحلے کی قیادت کریں گے۔ مذاکرات مقامی وقت کے مطابق ہفتے کی صبح شروع ہوں گے۔

خیال رہے کہ دونوں ممالک کے درمیان گزشتہ روز دو ہفتوں کے لیے عارضی جنگ بندی طے پائی ہے، جس کے تحت امریکا حملے بند رکھے گا اور ایران آبنائے ہرمز کھولے گا۔ اس سے قبل ایران نے 10 نکاتی تجاویز اور امریکا نے 15 نکات پر مبنی منصوبہ پیش کیا تھا، لیکن اس پر اتفاق نہیں ہو سکا تھا۔