ترک صدرکی جنگ بندی کرانے پر پاکستان کومبارکباد، معاہدے پر عملدرآمد ناگزیرقراردے دیا

ترکیے کے صدر رجب طیب اردوان نے امریکا اور ایران کے درمیان جنگ بندی کا خیرمقدم کرتے ہوئے اس امید کا اظہار کیا ہے کہ یہ معاہدہ کسی بھی قسم کی اشتعال انگیزی یا تخریبی کارروائی سے محفوظ رہتے ہوئے مکمل طور پر نافذ العمل ہوگا۔

سوشل میڈیاپر پیغام میں میں صدر اردوان نے خطے کی حالیہ کشیدہ صورتحال کا حوالہ دیتے ہوئے کہا کہ گزشتہ شب ہونے والا جنگ بندی کا اعلان ایک مثبت اور حوصلہ افزا پیش رفت ہے۔

انہوں نے اس پیش رفت پر اطمینان کا اظہار کرتے ہوئے کہا کہ اب اصل امتحان اس بات کا ہے کہ اس جنگ بندی کو عملی میدان میں کس حد تک مؤثر انداز میں برقرار رکھا جاتا ہے۔

صدر اردوان نے زور دیا کہ کسی بھی ممکنہ اشتعال، سازش یا تخریب کاری کو موقع دیے بغیر اس معاہدے پر مکمل عملدرآمد ناگزیر ہے کیونکہ ایسے نازک موقع پر معمولی سی لغزش بھی دوبارہ کشیدگی کو جنم دے سکتی ہے۔