لندن میں ہراسانی کے واقعے پر علامہ طاہر اشرفی کا ردعمل سامنے آگیا

چیئرمین پاکستان علماء کونسل حافظ طاہر محمود اشرفی نے لندن میں پیش آنے والے ہراسانی کے واقعے پر اپنا موقف سامنے رکھتے ہوئے کہا ہے کہ سیاسی اختلاف کی بنیاد پر اہل خانہ کے سامنے بدزبانی اور ہنگامہ آرائی ناقابل قبول ہے۔

اپنے ویڈیو بیان میں حافظ طاہر محمود اشرفی نے بتایا کہ وہ اہل خانہ کے ہمراہ ایک دعوت میں شرکت کے لیے جا رہے تھے کہ راستے میں بعض افراد نے انہیں روک لیا۔

انہوں نے کہا کہ اس دوران انہیں اور ان کے اہل خانہ کو ہراساں کیا گیا جبکہ نازیبا زبان بھی استعمال کی گئی۔

طاہر اشرفی کے مطابق بعض افراد نے فوج اور سپہ سالار سے متعلق سوالات کیے اور تلخ جملوں کا تبادلہ بھی ہوا۔

انہوں نے الزام عائد کیا کہ واقعے میں پاکستان تحریک انصاف سے وابستہ بعض افراد بھی شامل تھے۔

انہوں نے کہا کہ اختلاف رائے ہر شخص کا حق ہے، تاہم اسے اخلاقیات، برداشت اور شائستگی کے دائرے میں رہ کر آگے بڑھایا جانا چاہیے۔