محس نقوی کی چینی سفارتخانہ آمد، سرمایہ کاری، سکیورٹی امور پر گفتگو

کراچی: وفاقی وزیر داخلہ محسن نقوی نے کراچی میں چینی قونصلیٹ کا دورہ کیا، جہاں چین کے قونصل جنرل یانگ یونڈونگ نے ان کا پرتپاک خیر مقدم کیا۔ ملاقات کے دوران پاک چین دوطرفہ تعاون، چینی سرمایہ کاروں کو سہولیات کی فراہمی اور سکیورٹی سے متعلق امور پر تفصیلی تبادلہ خیال کیا گیا۔ وزیر داخلہ نے قونصل جنرل کو پاکستان میں مقیم چینی شہریوں اور ماہرین کی حفاظت کے لیے اٹھائے گئے غیر معمولی اقدامات سے آگاہ کیا، جس پر چینی قونصل جنرل نے مکمل اطمینان کا اظہار کیا۔

محسن نقوی نے چینی بزنس مینوں کے مسائل ترجیحی بنیادوں پر حل کرنے کی یقین دہانی کرواتے ہوئے اعلان کیا کہ چینی سرمایہ کاروں کی سہولت کے لیے جلد اسلام آباد میں ایک خصوصی کانفرنس منعقد کی جائے گی۔ انہوں نے کراچی کے چینی بزنس مینوں کو اس کانفرنس میں شرکت کی دعوت دیتے ہوئے کہا کہ چینی سرمایہ کار پاکستان کی تعمیر و ترقی میں ریڑھ کی ہڈی کی حیثیت رکھتے ہیں اور حکومت انہیں ہر سطح پر بزنس فرینڈلی ماحول فراہم کرنے کے لیے پرعزم ہے۔

وزیر داخلہ کا مزید کہنا تھا کہ ہم چاہتے ہیں کہ زیادہ سے زیادہ چینی کمپنیاں پاکستان میں سرمایہ کاری کریں، جس کے لیے ون ونڈو آپریشن اور دیگر مراعات فراہم کی جائیں گی۔ چینی قونصل جنرل یانگ یونڈونگ نے پاک چین اقتصادی شراکت داری کو مضبوط بنانے کے لیے وزیر داخلہ کے متحرک کردار کو سراہا اور شکریہ ادا کیا۔ ماہرین کے مطابق، وزیر داخلہ کا یہ دورہ اور اسلام آباد میں مجوزہ کانفرنس سی پیک (CPEC) کے دوسرے مرحلے میں چینی سرمایہ کاروں کا اعتماد بحال کرنے میں کلیدی کردار ادا کرے گی۔