بھارت سے واہگہ بارڈر کے راستے سکھ یاتری وساکھی منانے پاکستان پہنچ گئے

خالصہ پنتھ کے جنم دن اور وساکھی میلہ کی تقریبات میں شرکت کے لیے بھارت سے سکھ یاتریوں کا جتھہ واہگہ بارڈر کے راستے پاکستان پہنچ گیا ہے۔ واہگہ چیک پوسٹ پر صوبائی وزیر اقلیتی امور سردار رمیش سنگھ اروڑا، ایڈیشنل سیکرٹری شرائنز ناصر مشتاق، کمشنر لاہور اور ڈی سی لاہور نے یاتریوں کا شاندار استقبال کیا۔ اس موقع پر پاکستان سکھ گورو دوارہ پر بندھک کمیٹی کے اراکین بھی موجود تھے، جنہوں نے روایتی جوش و خروش کے ساتھ یاتریوں کو خوش آمدید کہا۔ کسٹم اور امیگریشن کے مراحل مکمل ہونے کے بعد یاتریوں کی تواضع چائے اور مشروبات سے کی گئی، جس کے بعد انہیں سخت سکیورٹی میں بسوں کے ذریعے گورو دوارہ جنم استھان ننکانہ صاحب روانہ کر دیا گیا۔

جتھہ لیڈر سردار ہرجیت سنگھ پپا نے میڈیا سے گفتگو کرتے ہوئے کہا کہ پاکستان ایک امن پسند ملک ہے اور یہاں سکھ کمیونٹی کو جو عزت و احترام ملتا ہے، اسی وجہ سے دنیا بھر کے سکھ یہاں آنے کے خواہش مند رہتے ہیں۔ ایڈیشنل سیکرٹری شرائنز ناصر مشتاق کے مطابق، یاتریوں کے لیے قیام و طعام، لنگر، ٹرانسپورٹ اور طبی سہولیات کے بہترین انتظامات مکمل کر لیے گئے ہیں۔ اتر پردیش اور دہلی سمیت مختلف بھارتی ریاستوں سے آنے والے یہ یاتری اپنی مذہبی رسومات کی ادائیگی کے لیے مختلف مقامات کا دورہ کریں گے، جبکہ وساکھی میلہ کی مرکزی تقریب 14 اپریل کو گورو دوارہ پنجہ صاحب، حسن ابدال میں منعقد ہوگی۔