وزیراعلیٰ پنجاب نے سرکاری ”میت منتقلی سروس“ کا آغاز کر دیا

وزیراعلیٰ پنجاب مریم نواز شریف نے عوامی ریلیف کے لیے ایک اور بڑے منصوبے کا سنگِ بنیاد رکھتے ہوئے پاکستان کی پہلی سرکاری ”میت منتقلی سروس“ (Deceased Care Service) کا باقاعدہ آغاز کر دیا ہے۔ اس سروس کے پہلے مرحلے میں لاہور، ملتان اور راولپنڈی کے سرکاری ہسپتالوں سے میتوں کو مکمل احترام اور تکریم کے ساتھ بلامعاوضہ ان کے گھروں تک منتقل کیا جائے گا۔ حکومتی پروگرام کے مطابق، رواں سال جون تک اس سروس کا دائرہ کار پنجاب کی ہر تحصیل تک پھیلا دیا جائے گا اور ہر تحصیل کو مخصوص ایمبولینسز فراہم کی جائیں گی۔

وزیراعلیٰ مریم نواز نے خود ان خصوصی گاڑیوں کا معائنہ کیا اور متعلقہ اضلاع کے حکام کو چابیاں حوالے کیں۔ اس موقع پر انہوں نے ریسکیو اہلکاروں سے ملاقات میں ہدایت کی کہ وہ اس خدمت کو صرف سرکاری فریضہ نہیں بلکہ رضائے الٰہی اور انسانی ہمدردی کے جذبے کے تحت انجام دیں۔ انہوں نے واضح کیا کہ ہسپتالوں میں نجی ٹرانسپورٹرز کی جانب سے سوگوار خاندانوں سے من مانے کرائے وصول کرنا ایک تکلیف دہ عمل تھا، جس کا اب خاتمہ کر دیا گیا ہے۔

مریم نواز شریف نے ریسکیو اہلکاروں کو سختی سے تاکید کی کہ اگر کوئی سوگوار خاندان ذاتی طور پر پیسے دینے کی کوشش کرے تو اسے ہرگز قبول نہ کیا جائے۔ انہوں نے کہا کہ دکھ کی اس گھڑی میں حکومت پنجاب متاثرہ خاندانوں کے ساتھ کھڑی ہے اور یہ سروس نہ صرف ٹرانسپورٹ فراہم کرے گی بلکہ سوگواروں کو اخلاقی دلاسہ اور معاونت بھی فراہم کرے گی۔ اس اقدام کو عوامی حلقوں میں بڑے پیمانے پر سراہا جا رہا ہے، کیونکہ اس سے غریب اور متوسط طبقے کو میت کی منتقلی میں درپیش مالی و انتظامی مشکلات سے نجات ملے گی۔