پنجاب میں 18 سال سے کم عمر افراد کی شادی پر پابندی کا بل منظور

پنجاب اسمبلی نے ‘چائلڈ میرج ریسٹرینٹ بل 2026’ منظور کرتے ہوئے صوبے بھر میں 18 سال سے کم عمر کی شادی کو غیر قانونی قرار دے دیا ہے۔ نئے قانون کے تحت نکاح کے وقت دولہا اور دلہن دونوں کی عمر کم از کم 18 سال ہونا لازمی ہے، اور اس کی خلاف ورزی کو قابلِ تعزیر جرم قرار دیتے ہوئے کرمنل ایکٹ کے تحت کارروائی کی جائے گی۔ بل کے مطابق، کم عمر سے شادی کرنے والے شخص کو 3 سال قید اور 5 لاکھ روپے جرمانہ ہوگا، جبکہ کم عمر بچے کو دوسرے صوبے لے جا کر شادی کرنے پر 7 سال تک قید کی سزا دی جا سکے گی۔ مزید برآں، نکاح خواں، والدین اور سرپرست بھی قانون کی گرفت میں آئیں گے، جنہیں قید اور بھاری جرمانے بھگتنا ہوں گے۔ گورنر پنجاب کی حتمی منظوری کے بعد یہ بل 1929 کے پرانے ایکٹ کی جگہ لے لے گا۔