چیئرمین پی سی بی نے پی ایس ایل میں شائقین کی اسٹیڈیم میں واپسی کا عندیہ دے دیا

کراچی: چیئرمین پاکستان کرکٹ بورڈ محسن نقوی نے کہا ہے کہ پاکستان سپر لیگ (پی ایس ایل) 11 میں اسٹیڈیمز میں شائقین کی موجودگی کے لیے ہر ممکن کوشش کی جائے گی اور اس حوالے سے وزیراعظم سے بھی بات کی جائے گی۔

کراچی کے نیشنل بینک کرکٹ ایرینا میں میڈیا سے گفتگو کرتے ہوئے انہوں نے کہا کہ کافی عرصے بعد فرنچائزز کے نمائندگان سے ملاقات ہوئی ہے جس میں مختلف معاملات پر تفصیلی بات چیت کی گئی۔

کراؤڈ کی عدم موجودگی سے متعلق سوال پر انہوں نے کہا کہ اس معاملے پر وزیراعظم شہباز شریف سے دوبارہ بات کریں گے اور دیکھنا ہوگا کہ اس وقت دنیا میں کون سے چیلنجز اور بحران چل رہے ہیں۔

انہوں نے کہا کہ موجودہ حالات میں پی ایس ایل کا انعقاد ایک بڑی کامیابی ہے اور اس میں سیکیورٹی فورسز کا کردار قابلِ تحسین ہے۔

چیئرمین پی سی بی کے مطابق شائقین کو اسٹیڈیم میں لانے کے لیے بھرپور کوشش کی جائے گی جبکہ فرنچائزز کو گیٹ منی کی مد میں ادائیگی کی جائے گی اور اس کے اخراجات پی سی بی برداشت کرے گا۔