وزیراعظم شہباز شریف کی زیر صدارت الیکٹرک گاڑیوں کے فروغ پر اہم اجلاس، اقدامات تیز کرنے کی

اسلام آباد: وزیراعظم شہباز شریف کی زیر صدارت ملک میں الیکٹرک وہیکلز (EV) کے فروغ کے حوالے سے ایک اہم اجلاس منعقد ہوا، جس میں جاری اقدامات کا تفصیلی جائزہ لیا گیا۔
وزیراعظم نے ہدایت کی کہ ملک میں الیکٹرک گاڑیوں کے فروغ کیلئے جاری اقدامات میں مزید تیزی لائی جائے۔ انہوں نے کہا کہ موجودہ علاقائی صورتحال اور مستقبل کی ضروریات کے پیش نظر EV پالیسی نہ صرف ایندھن کے درآمدی بوجھ میں کمی کا باعث بنے گی بلکہ ماحولیاتی تحفظ اور توانائی کے تحفظ کیلئے بھی نہایت اہم ہے۔
وزیراعظم نے زور دیا کہ قومی ای وی پالیسی کے تحت کم آمدنی والے افراد کیلئے الیکٹرک موٹر سائیکلوں پر دی جانے والی سبسڈی میں مکمل شفافیت یقینی بنائی جائے اور اس اسکیم پر عملدرآمد کو تیز کیا جائے۔
اجلاس کو بریفنگ میں بتایا گیا کہ ملک بھر میں الیکٹرک موٹر سائیکل اور رکشہ بنانے کیلئے 72 جبکہ الیکٹرک گاڑیوں کیلئے 4 مینوفیکچرنگ سرٹیفیکیٹس جاری کیے جا چکے ہیں۔ مزید برآں EV چارجنگ اسٹیشنز کے قیام کیلئے اب تک 123 درخواستیں موصول ہو چکی ہیں۔
بریفنگ کے مطابق آئندہ پانچ سالوں میں ملک میں 30 فیصد گاڑیوں کو الیکٹرک پر منتقل کرنے کی منصوبہ بندی کی جا رہی ہے، جس سے تقریباً 4.5 بلین ڈالر تک ایندھن کی بچت متوقع ہے۔
اجلاس میں یہ بھی بتایا گیا کہ گریڈ 16 تک کے سرکاری ملازمین کو آسان اقساط پر الیکٹرک بائیکس فراہم کی جائیں گی تاکہ اس پالیسی کے فروغ کو مزید تقویت دی جا سکے۔
اجلاس میں وفاقی وزراء، اعلیٰ حکام اور متعلقہ اداروں کے نمائندگان نے شرکت کی۔