امریکا ایران تنازع ختم کرنے کیلئے سفارت کاری، وزیراعظم ہاؤس میں اہم اجلاس طلب

وزیراعظم شہباز شریف نے مشرقِ وسطیٰ میں جاری کشیدگی کے خاتمے اور خطے میں پائیدار امن کے قیام کے لیے اپنی سفارتی کاوشوں کو تیز کرتے ہوئے ایک اہم اعلیٰ سطح کا اجلاس طلب کر لیا ہے۔ ذرائع کے مطابق، اس اجلاس میں وفاقی کابینہ کے سینئر اراکین اور متعلقہ اداروں کے اعلیٰ حکام شرکت کریں گے، جس میں اسلام آباد میں ہونے والے امریکہ اور ایران مذاکرات کے بعد پیدا ہونے والی تازہ ترین صورتحال کا تفصیلی جائزہ لیا جائے گا۔

اجلاس کے دوران وزیراعظم حالیہ مذاکرات کی کامیابی میں پاکستانی قیادت کے مصالحتی کردار پر روشنی ڈالیں گے اور اس بات پر مشاورت کی جائے گی کہ طے پانے والی جنگ بندی پر مکمل عملدرآمد کو کیسے یقینی بنایا جائے۔ ذرائع کا کہنا ہے کہ پاکستان اب اس جنگ بندی میں توسیع کے لیے بھرپور سفارتی کوششیں کر رہا ہے تاکہ خطے کو کسی بڑے انسانی یا معاشی بحران سے بچایا جا سکے۔ وزیراعظم اس حوالے سے شرکاء کو اپنی مستقبل کی حکمتِ عملی سے بھی آگاہ کریں گے۔

پاکستان کی ان سفارتی کوششوں کے تسلسل میں وزیراعظم شہباز شریف جلد سعودی عرب اور ترکیہ کے دوروں پر روانہ ہو رہے ہیں۔ ان دوروں کا مقصد برادر اسلامی ممالک کی قیادت کو اعتماد میں لینا اور جنگ بندی کی مدت بڑھانے کے لیے ایک مشترکہ لائحہ عمل تیار کرنا ہے۔ سیاسی مبصرین کا کہنا ہے کہ وزیراعظم کی یہ متحرک سفارت کاری عالمی سطح پر پاکستان کے بڑھتے ہوئے قد کاٹھ اور خطے کے استحکام کے لیے اس کی سنجیدگی کو ظاہر کرتی ہے۔