حکومت یورپی یونین سے تجارتی تعلقات کیلئے سنجیدہ کوششیں جاری رکھے گی: وزیراعظم

وزیراعظم شہباز شریف نے کہا ہے کہ یورپی یونین پاکستان کا اہم ترین تجارتی شراکت دار ہے اور حکومت یورپی کمپنیوں کے ساتھ سرمایہ کاری کے تعلقات کو مزید وسعت دینے کے لیے سنجیدہ کوششیں کر رہی ہے۔ ان خیالات کا اظہار انہوں نے یورپی کمیشن کے ڈائریکٹر پیٹرس اسٹبس کی قیادت میں آئے ہوئے ایک اعلیٰ سطحی وفد سے ملاقات کے دوران کیا، جس میں ایڈیڈاز، آئیکیا اور یورپی انویسٹمنٹ بینک کے نمائندے بھی شامل تھے۔ وزیراعظم نے وفد کو تیل کی بڑھتی ہوئی قیمتوں اور علاقائی چیلنجز کے باوجود معاشی استحکام کے حکومتی عزم کا یقین دلایا۔ ملاقات میں توانائی، آئی ٹی اور مواصلات کے شعبوں میں ‘بزنس ٹو بزنس’ تعلقات کو فروغ دینے پر تبادلہ خیال کیا گیا۔ یورپی وفد نے علاقائی امن کے لیے وزیراعظم کے کردار کو سراہتے ہوئے پاکستان میں سرمایہ کاری کے وسیع مواقعوں پر اعتماد کا اظہار کیا۔