امن کا موقع ضائع نہیں ہونے دیں گے،پاکستان کی سیاسی وعسکری قیادت کا مذاکرات کی کامیابی کےلیے عزم

وزیراعظم شہباز شریف کی زیرصدارت اعلیٰ سطح کا مشاورتی اجلاس ہوا  جس میں سیاسی و عسکری قیادت نے امریکا اور ایران مذاکرات کامیاب بنانے کے عزم کا اظہار کیا۔اجلاس میں اعلیٰ عسکری اور سول قیادت نے اسلام آباد مذاکرات کےحوالے سے تفصیلی مشاورت کی۔

شرکاء نے اسلام آباد مذاکرات کو کامیاب بنانے کے عزم کا اظہار کیااور کہا کہ جنگ بندی پر پاکستان کا مثبت، تعمیری کردارعالمی سطح پرسراہا جارہا ہے، امن کا یہ موقع ضائع نہیں ہونے دیا جائے گا۔ شرکاء نے جنگ بندی میں کلیدی کردار پر فیلڈ مارشل سید عاصم منیرکو بھرپور خراج تحسین پیش کیا۔

مستقل جنگ بندی کےلیے امریکا اور ایران کے درمیان مذاکرات اسلام آباد میں ہوں گے، وزیراعظم  شہباز شریف کو مذاکرات کی جگہ سے متعلق بریفنگ دی گئی، وزیراعظم کو دفتر خارجہ سمیت اہم مقامات اور معزز مہمانوں کی آمد و رفت اور ان کیلئے انتظامات سے آگاہ کیاگیا۔

ذرائع کے مطابق وزیراعظم شہبازشریف نے مذاکراتی مقام سمیت دیگر جگہوں کا دورہ کیا، وزیراعظم  کے ساتھ وزیر داخلہ اور دیگر متعلقہ حکام بھی شریک تھے۔ وزیراعظم نے متعلقہ حکام کو ہدایت کی کہ مہمانوں کی آمد،انتظامات میں کوئی کوتاہی نہ برتی جائے۔