فرانسیسی صدرکا وزیراعظم شہبازشریف سےٹیلی فونک رابطہ، جنگ بندی کروانے پر مبارکباد

وزیرِاعظم شہباز شریف کا فرانسیسی صدر ایمانویل میکخواں سے ٹیلی فونک رابطہ ہوا، جس میں اسلام آباد مذاکرات سمیت دیگر اُمور پر بات چیت ہوئی۔

وزیر اعظم کے دفتر سے  جاری کردہ اعلامیے کے مطابق میکخوان نے امریکا اور ایران کے مابین ثالثی کے ذریعے جنگ بندی کروانے پر شہباز شریف کو مبارکباد دی۔

بیان کے مطابق فرانسیسی صدر نے امریکا اورایران کے درمیان ہونے والے مذاکرات کے لیے نیک خواہشات کا اظہار کیا اور فریقین کو مذاکرات کی میز پر لانے کا بھی خیر مقدم کیا۔

وزیراعظم شہباز شریف نے فرانسیسی صدر کا شکریہ ادا کرتے ہوئے کہا کہ پاکستان خطے میں امن اور استحکام کے لیے اپنی کوششوں کا سلسلہ جاری رکھے گا۔

بیان کے مطابق دونوں رہنماؤں نے لبنان میں جاری جارحیت پر اپنے خدشات کا اظہار کرتے ہوئے مطالبہ کیا کہ وہاں فوری طور پر تشدد اور ہلاکتوں کا سلسلہ بند ہونا چاہیے، تاکہ پورے خطے میں امن بحال ہو سکے۔