ایران امریکا کے درمیان تعمیری مذاکرات کے کئی دور ہوئے، پاکستان کا مثبت کردار: اسحاق ڈار

وزیر خارجہ اسحاق ڈار نے کہا ہے کہ ایران اور امریکا کے درمیان ہونے والے مذاکرات میں کئی جامع اور تعمیری ادوار ہوئے، جن میں پاکستان نے مؤثر اور مثبت کردار ادا کیا۔

اسلام آباد میں پریس بریفنگ دیتے ہوئے اسحاق ڈار نے بتایا کہ امریکی وفد کی قیادت نائب صدر جے ڈی وینس جبکہ ایرانی وفد کی قیادت اسپیکر باقر قالیباف نے کی۔ انہوں نے کہا کہ دونوں وفود کے درمیان مختلف امور پر تفصیلی اور تعمیری گفتگو ہوئی۔

اسحاق ڈار کے مطابق انہوں نے بطور نائب وزیراعظم اور فیلڈ مارشل سید عاصم منیر نے اس مذاکراتی عمل میں معاونت فراہم کی اور فریقین کے درمیان رابطے کو مؤثر بنانے میں کردار ادا کیا۔

انہوں نے کہا کہ پاکستان ہمیشہ خطے میں امن کے قیام کے لیے اپنا کردار ادا کرتا رہے گا اور ایران و امریکا کے درمیان بھی سہولت کار کے طور پر اپنی کوششیں جاری رکھے گا۔

وزیر خارجہ نے کہا کہ دونوں ممالک کی جانب سے پاکستان کے مثبت کردار کے اعتراف پر شکر گزار ہیں اور امید ظاہر کی کہ فریقین خطے اور دنیا میں پائیدار امن اور خوشحالی کے لیے مثبت پیش رفت جاری رکھیں گے۔

انہوں نے اس بات پر بھی زور دیا کہ دونوں ممالک کو جنگ بندی برقرار رکھنے کے عزم پر قائم رہنا چاہیے تاکہ مذاکراتی عمل آگے بڑھ سکے۔