پاک چین صنعتی تعاون میں بڑی پیش رفت؛ 60 سے زائد چینی کمپنیوں کے وفد کی مئی میں پاکستان آمد متوقع

چین میں پاکستان کے سفیر خلیل ہاشمی نے چین کے اہم صنعتی مرکز ننگبو (Ningbo) کا ایک کامیاب دورہ کیا ہے، جس کا مقصد دونوں ممالک کے درمیان صنعتی تعاون اور بی ٹو بی (B2B) سرمایہ کاری کو فروغ دینا ہے۔ پاک چین صنعتی تعاون سمٹ سے خطاب کرتے ہوئے سفیر خلیل ہاشمی نے آئی سی ٹی، فارماسیوٹیکل اور ٹیکسٹائل سمیت 21 ترجیحی شعبوں میں سرمایہ کاری کے مواقع اجاگر کیے۔ اس موقع پر پاکستانی سفارت خانے اور IBI Group کے اشتراک سے آئی سی ٹی اور فارماسیوٹیکل شعبوں میں دو اہم سرمایہ کاری راؤنڈ ٹیبلز کا انعقاد بھی کیا گیا، جس میں دو درجن سے زائد بڑی چینی کمپنیوں نے شرکت کی۔

اس دورے کا ایک اہم ترین نتیجہ آئی بی آئی گروپ کی جانب سے اسلام آباد میں اپنا علاقائی دفتر قائم کرنے کا اعلان ہے، جو دوطرفہ تجارتی روابط کو مزید مستحکم کرے گا۔ مزید برآں، 60 سے زائد چینی کاروباری رہنماؤں کا ایک بڑا وفد مئی میں پاکستان کا دورہ کرے گا، جہاں وہ مقامی کاروباری برادری کے ساتھ بزنس میچ میکنگ ایونٹس میں شرکت کریں گے۔ سفیر خلیل ہاشمی نے چینی کمپنیوں کو لاہور میں 9 اور 10 مئی کو ہونے والی ہوم اپلائنسز اور بیٹری اسٹوریج کانفرنس، اور جون 2026 میں منعقد ہونے والی فارماسیوٹیکل و ہیلتھ کیئر کانفرنس میں شرکت کی دعوت بھی دی ہے۔

ننگبو شہر، جو چین کی معیشت میں سالانہ 275 ارب ڈالر سے زائد کا حصہ ڈالتا ہے، کے سرمایہ کاروں نے پاکستان کو سرمایہ کاری کے لیے ایک بہترین مقام قرار دیا ہے۔ چینی کمپنیوں نے پاکستان میں لیبر کی کم لاگت اور حکومت کی جانب سے فراہم کردہ سازگار پالیسیوں کو سراہتے ہوئے کیمیکلز، آئی ٹی اور ٹیکسٹائل کے شعبوں میں گہری دلچسپی کا اظہار کیا ہے۔ ماہرین کا ماننا ہے کہ مئی اور جون میں ہونے والی یہ کانفرنسیں پاکستان میں غیر ملکی سرمایہ کاری کے ایک نئے دور کا آغاز ثابت ہو سکتی ہیں۔