پاکستان میں گاڑیوں، ٹرکوں اور موٹر سائیکلوں کی فروخت میں بڑا اضافہ

کراچی: ملک میں آٹو موبائل سیکٹر میں نمایاں بہتری دیکھنے میں آئی ہے، جہاں گاڑیوں، ٹرکوں، بسوں اور موٹر سائیکلوں کی فروخت میں نمایاں اضافہ ریکارڈ کیا گیا ہے۔

پاکستان آٹو موٹیو مینوفیکچررز ایسوسی ایشن (پاما) کے جاری کردہ اعداد و شمار کے مطابق رواں مالی سال کے دوران گاڑیوں کی فروخت میں سالانہ 43 فیصد اضافہ ہوا، جبکہ جولائی تا مارچ مجموعی طور پر 1 لاکھ 44 ہزار 29 گاڑیاں فروخت ہوئیں۔

مارچ 2026ء میں گاڑیوں کی فروخت میں سالانہ بنیادوں پر 50 فیصد اضافہ ریکارڈ کیا گیا اور فروخت کا حجم 15 ہزار 531 یونٹس رہا، تاہم ماہانہ بنیادوں پر 9 فیصد کمی دیکھنے میں آئی۔

رواں سال مارچ کے دوران ٹریکٹرز کی فروخت میں سالانہ بنیادوں پر 96 فیصد جبکہ ماہانہ بنیادوں پر 75 فیصد اضافہ ہوا۔

دیگر شعبوں میں بھی بہتری کا رجحان رہا، جہاں جولائی تا مارچ ٹرکوں کی فروخت 82 فیصد اضافے کے ساتھ 2 ہزار 823 یونٹس تک پہنچ گئی، جبکہ بسوں کی فروخت 33 فیصد بڑھ کر 542 یونٹس رہی۔

اسی طرح موٹر سائیکلوں کی فروخت میں بھی نمایاں اضافہ ہوا اور یہ 32 فیصد اضافے کے ساتھ 10 لاکھ 59 ہزار 898 یونٹس تک جا پہنچی۔

ماہرین کا کہنا ہے کہ معاشی سرگرمیوں میں بہتری اور طلب میں اضافے کے باعث آٹو سیکٹر کی کارکردگی میں مزید بہتری متوقع ہے۔