پاک بحریہ کا شمالی بحیرہ عرب میں کامیاب ریسکیو آپریشن، 18 افراد کو بچا لیا

شمالی بحیرہ عرب میں پاک بحریہ نے انسانی ہمدردی کی بنیاد پر ایک کامیاب آپریشن کرتے ہوئے تجارتی بحری جہاز ایم وی گولڈ آٹم (MV Gold Autumn) کے عملے کے 18 ارکان کو بحفاظت ریسکیو کر لیا ہے۔ پاکستانی ساحل سے تقریباً 200 ناٹیکل میل دور پیش آنے والے اس واقعے میں جہاز سے ہنگامی سگنل موصول ہوئے تھے، جس پر پاکستان میری ٹائم سکیورٹی ایجنسی (PMSA) نے فوری طور پر ریسکیو کوآرڈینیشن سینٹر کو فعال کیا۔ امدادی کارروائی کے لیے سمندری حدود کی نگرانی پر مامور پاک بحریہ کے جدید جہاز پی این ایس حنین کو روانہ کیا گیا جس نے پیشہ ورانہ مہارت کا مظاہرہ کرتے ہوئے آپریشن مکمل کیا۔

ریسکیو کیے گئے عملے میں چین، بنگلہ دیش، میانمار، ویتنام اور انڈونیشیا کے شہری شامل ہیں۔ پاک بحریہ کی ماہر ٹیم نے نہ صرف تجارتی جہاز پر لگی آگ بجھانے میں معاونت فراہم کی بلکہ متاثرہ افراد کو فوری طبی امداد بھی دی۔ آپریشن کے بعد تمام 18 افراد کو مزید طبی دیکھ بھال اور ان کے متعلقہ ممالک واپسی کے لیے کراچی منتقل کر دیا گیا ہے۔ پاک بحریہ کا یہ بروقت اور مؤثر اقدام سمندر میں انسانی جانوں کے تحفظ اور کسی بھی ہنگامی صورتحال سے نمٹنے کے لیے اس کی ہمہ وقت تیاری کا منہ بولتا ثبوت ہے۔