خطے میں عسکری سرگرمیاں تیز: چین، ایران اور روس کی مشترکہ مشقیں

اسرائیلی چینل 12 کے مطابق اردن میں امریکی THAAD ایئر ڈیفنس سسٹم کی بیٹری تعینات کی جا رہی ہے، جبکہ چین روزانہ کی بنیاد پر امریکی طیارہ بردار جہازوں کو سیٹلائٹ کے ذریعے ٹریک کر رہا ہے۔

ماہرین کا کہنا ہے کہ چین کی یہ ٹریکنگ ایران کے لیے مددگار ثابت ہو سکتی ہے، کیونکہ عالمی سیاست میں دشمن کا دشمن دوست تصور کیا جاتا ہے۔ تجزیہ کاروں کے مطابق متعدد ممالک امریکا کی براہِ راست مخالفت کے بجائے ایران کے پسِ منظر میں یہ کھیل کھیلنا چاہتے ہیں، اور اگر امریکا نے اپنی پالیسیوں میں نرمی نہ دکھائی تو یہ رجحان مزید بڑھے گا۔

اسی تناظر میں ایران نے چین اور روس کو مشترکہ بحری مشقوں کی دعوت دے دی ہے۔ چین، روس اور ایران کی بحری افواج ایرانی بحری حدود میں داخل ہو چکی ہیں، جبکہ اتوار کے روز آبنائے ہرمز کے قریب مشترکہ فوجی مشقیں منعقد کی جائیں گی، جنہیں ٹی وی چینلز پر براہِ راست دکھایا جائے گا۔

چینی فوج کے ٹائپ 055 اور 052D کے کئی بھاری جنگی بحری جہاز ’’ہائنان‘‘ کے بحری اڈے سے ایرانی پانیوں کی جانب روانہ کیے جا چکے ہیں۔

دوسری جانب امریکی فضائیہ یورپ میں اپنے اڈوں پر کئی ایف-35 پانچویں نسل کے جنگی جہاز تعینات کر رہی ہے۔ باخبر ذرائع کے مطابق مضبوط شواہد موجود ہیں کہ یہ جنگی طیارے آئندہ مشرقِ وسطیٰ کی جانب بھی منتقل ہو سکتے ہیں، جبکہ ان کی حتمی تعیناتی کے مقصد پر ابھی وضاحت سامنے نہیں آئی۔

ادھر روسی فضائیہ کا Il-76MD-90A طیارہ نامعلوم پے لوڈ کے ساتھ ماسکو سے ایران پہنچا ہے، جس نے خطے کی صورتحال کو مزید حساس بنا دیا ہے۔