سیاحت کی بحالی کے منصوبوں پر 28 ارب روپے خرچ کیے جا رہے ہیں: مریم اورنگزیب

سینیئر صوبائی وزیر مریم اورنگزیب نے لاہور میں ایک تقریب سے خطاب کرتے ہوئے کہا ہے کہ حکومتِ پنجاب صوبے میں سیاحت اور تاریخی ورثے کی بحالی کے منصوبوں پر 28 ارب روپے خرچ کر رہی ہے، جبکہ مجموعی طور پر اس شعبے کے لیے 78 ارب روپے کے وسائل بروئے کار لائے جا رہے ہیں۔ انہوں نے بتایا کہ وزیراعلیٰ مریم نواز شریف کے وژن کے تحت پہلی بار سیاحت کو ایک باقاعدہ معاشی شعبے کے طور پر منظم کیا جا رہا ہے اور اس مقصد کے لیے ‘پنجاب ٹورازم اتھارٹی’ بھی قائم کر دی گئی ہے۔ مریم اورنگزیب نے ‘میگنیفیسنٹ پنجاب ایپ’ (Magnificent Punjab App) کا ذکر کرتے ہوئے کہا کہ اس سے سیاحوں کو تمام مقامات کی جامع معلومات میسر ہوں گی۔ ان کا مزید کہنا تھا کہ پبلک پرائیویٹ پارٹنرشپ کے ذریعے ہوٹلنگ اور ایکو ٹورازم کو فروغ دیا جا رہا ہے تاکہ پنجاب عالمی سیاحت کا مرکز بن سکے۔