فیصل کریم کنڈی سے برطانوی ہائی کمشنر کی ملاقات، دوطرفہ تعاون بڑھانے پر اتفاق

گورنر خیبرپختونخوا فیصل کریم کنڈی اور برطانوی ہائی کمشنر جین میریٹ کے درمیان ایک اہم ملاقات ہوئی، جس میں دوطرفہ تعلقات، علاقائی سلامتی اور صوبے کی ترقی کے لیے مختلف شعبوں میں تعاون بڑھانے پر اتفاق کیا گیا۔ اس موقع پر برطانوی ہائی کمشنر نے گورنر کے اعزاز میں عشائیہ بھی دیا۔

ملاقات کے دوران توانائی، معدنی وسائل، سرمایہ کاری اور پائیدار ترقی کے منصوبوں میں برطانوی تکنیکی تعاون اور ادارہ جاتی شراکت داری کو مزید مستحکم کرنے پر غور کیا گیا۔ جین میریٹ نے ایران اور امریکہ کے درمیان کشیدگی کم کرانے اور جنگ بندی کے لیے پاکستان کی سفارتی کوششوں کی تعریف کرتے ہوئے کہا کہ خطے میں امن کے لیے پاکستان کا کردار کلیدی ہے۔

گورنر فیصل کریم کنڈی نے گفتگو کرتے ہوئے واضح کیا کہ پاکستان ہمیشہ سے مذاکرات اور سفارت کاری کے ذریعے عالمی امن کا حامی رہا ہے۔ انہوں نے برطانوی حکومت سے مطالبہ کیا کہ خیبرپختونخوا کے باصلاحیت نوجوانوں اور ماہرین کے لیے برطانیہ میں روزگار اور تعلیم کے مزید مواقع فراہم کیے جائیں، کیونکہ صوبے کے نوجوان پہلے ہی برطانیہ کی ترقی میں اہم کردار ادا کر رہے ہیں۔