پاکستان کو بطور بااعتماد ثالث پوری دنیا نے تسلیم کر لیا: خواجہ آصف

وزیر دفاع خواجہ محمد آصف نے کہا ہے کہ پاکستان ایک بااعتماد ثالث کے طور پر عالمی نقشے پر ابھرا ہے اور پوری دنیا نے اس کے کلیدی کردار کو تسلیم کر لیا ہے۔ پارلیمنٹ ہاؤس کے باہر میڈیا سے گفتگو کرتے ہوئے انہوں نے قوم کو مبارکباد دی اور کہا کہ اللہ کے فضل سے پاکستان ایک بہت بڑی عالمی جنگ رکوانے میں کامیاب ہوا ہے۔ ان کا کہنا تھا کہ سول اور عسکری قیادت پر مشتمل “ہائبرڈ ماڈل” نے گزشتہ دو تین سالوں میں بے پناہ کامیابیاں سمیٹی ہیں، جس سے ثابت ہوتا ہے کہ جب ریاست کے تمام طاقت کے مراکز مل کر کام کریں تو پاکستان عالمی سطح پر ناقابلِ تسخیر کامیابیاں حاصل کر سکتا ہے۔

وزیر دفاع نے روایتی حریف بھارت پر کڑی تنقید کرتے ہوئے کہا کہ اس بڑی سفارتی کامیابی کے بعد “مودی فارغ ہو گیا ہے” اور بھارتی میڈیا اب صرف تڑپتا ہی رہے گا۔ انہوں نے یاد دلایا کہ پاکستان نے اپنے سے پانچ گنا بڑے دشمن کو دھول چٹائی ہے اور بھارت اب تک اپنی کھوئی ہوئی ساکھ بحال کرنے کی کوشش کر رہا ہے۔ خواجہ آصف نے افغانستان کو بھی آڑے ہاتھوں لیتے ہوئے کہا کہ اسے پاکستان کی دہائیوں پر محیط میزبانی کی حیا کرنی چاہیے، اور اگر وہ ایسا نہیں کرتا تو پاکستان کے پاس سخت فیصلے کرنے کے علاوہ کوئی دوسرا آپشن نہیں ہوگا۔ انہوں نے زور دیا کہ ان بین الاقوامی کامیابیوں کے بعد اب وقت آگئی ہے کہ قوم متحد ہو کر داخلی محاذ، معیشت اور دہشت گردی جیسے چیلنجز پر قابو پائے۔