دنیا کی نظریں پاکستان پر ہیں، وزیراعظم اور فیلڈ مارشل کی حکمتِ عملی سے ملک کا تشخص بہتر ہوا؛ وزیر دفاع خواجہ آصف

اسلام آباد: وفاقی وزیر دفاع خواجہ آصف نے صحافیوں سے گفتگو کرتے ہوئے کہا ہے کہ پاکستان اس وقت ایک ایسے اہم موڑ پر کھڑا ہے جہاں پوری دنیا کی نظریں ہم پر لگی ہوئی ہیں۔ انہوں نے دعویٰ کیا کہ وزیراعظم اور فیلڈ مارشل کی مشترکہ اسٹریٹیجی کی بدولت بین الاقوامی سطح پر پاکستان کے تشخص میں نمایاں بہتری آئی ہے۔ وزیر دفاع کا کہنا تھا کہ ملک کی خارجہ اور دفاعی پالیسیوں کے مثبت نتائج برآمد ہو رہے ہیں جس سے عالمی فورمز پر پاکستان کی اہمیت میں اضافہ ہوا ہے۔

علاقائی صورتحال پر گفتگو کرتے ہوئے خواجہ آصف نے خواہش ظاہر کی کہ ایران، لبنان اور فلسطین کے حقوق کسی صورت پامال نہیں ہونے چاہئیں۔ انہوں نے مشرقِ وسطیٰ میں جاری کشیدگی کے خاتمے کے لیے دعا کی کہ مذاکرات کا دوسرا راؤنڈ کامیاب ہو تاکہ خطے میں پائیدار امن قائم ہو سکے۔ ان کا کہنا تھا کہ پاکستان ہمیشہ سے مظلوم فلسطینیوں اور خطے کے دیگر ممالک کے خود مختار حقوق کا حامی رہا ہے اور امن کی کوششوں میں اپنا کردار ادا کرتا رہے گا۔

 گفتگو کے دوران جب ایک صحافی نے سوال کیا کہ “خبریں ہیں کہ پاکستان ایئر فورس کے جہاز سعودی عرب پہنچ گئے ہیں، اس میں کتنی صداقت ہے؟” تو وزیر دفاع نے اس پر براہِ راست تبصرہ کرنے سے گریز کیا۔ انہوں نے جواب دیا کہ “یہ ایک اسٹریٹجک معاملہ ہے، اس کا جواب نہیں دے سکتا”۔ ماہرین وزیر دفاع کے اس محتاط رویے کو خطے کی حساس صورتحال اور پاک-سعودی دفاعی تعاون کی رازداری کے تناظر میں انتہائی اہم قرار دے رہے ہیں۔