کراچی: میٹرک امتحانات میں پرچہ آؤٹ ہونے کی روایت برقرار؛ دسویں کا بائیولوجی کا پیپر وقت سے پہلے وائرل

کراچی میں میٹرک کے سالانہ امتحانات کے دوران پرچہ آؤٹ ہونے کی روایت برقرار ، دسویں جماعت کا بائیولوجی کا پرچہ بھی امتحان سے قبل ہی سوشل میڈیا پر وائرل ہوگیا۔ذرائع کے مطابق بائیولوجی کا پرچہ امتحان شروع ہونے سے تقریباً آدھا گھنٹہ قبل مختلف واٹس ایپ گروپس اور دیگر سوشل میڈیا پلیٹ فارمز پر گردش کرتا رہا۔ طلبہ اور والدین کی جانب سے پرچہ آؤٹ ہونے پر شدید تشویش کا اظہارکیا گیا ۔ طلبہ کا کہنا ہے کہ امتحانی نظام کی شفافیت پر سوالات اٹھ رہے ہیں جبکہ محنتی طلبہ کے ساتھ ناانصافی ہو رہی ہے۔ دوسری جانب میٹرک بورڈ انتظامیہ کی جانب سے امتحانات کے شفاف انعقاد کے دعوے بھی ایک بار پھر دھرے کے دھرے رہ گئے۔تعلیمی حلقوں کا کہنا ہے کہ ہر سال پرچے آؤٹ ہونے کے واقعات سامنے آتے ہیں مگر اس کے تدارک کے لیے مؤثر اقدامات نہیں کیے جا سکے۔ ماہرین نے مطالبہ کیا ہے کہ اس معاملے کی شفاف تحقیقات کر کے ذمہ داروں کے خلاف سخت کارروائی کی جائے