ایران ۔ امریکا مذاکرات: اسلام آباد میں ٹریفک ڈائیورشن پلان ترتیب، اہم سڑکیں بند رہیں گی

اسلام آباد میں مختلف اوقات کے دوران ٹریفک ڈائیورشن پلان نافذ کر دیا گیا ہے جبکہ ریڈ زون اور توسیعی ریڈ زون کو مکمل طور پر بند رکھنے کا فیصلہ کیا گیا ہے۔

اسلام آباد ٹریفک پولیس کے مطابق کشمیر چوک کلب روڈ سے سرینگر ہائی وے کی جانب زیرو پوائنٹ تک ٹریفک بند رہے گی، جبکہ سرینگر ہائی وے زیرو پوائنٹ سے سرینا چوک تک بھی بند رہے گی۔

مزید بتایا گیا ہے کہ شکر پڑیاں روڈ چاند تارا چوک سے سیونتھ ایونیو کی طرف بند ہوگی جبکہ جناح ایونیو خیابان چوک سے بلیو ایریا روڈ تک ٹریفک کے لیے بند رہے گی۔

ٹریفک پولیس کے مطابق فیصل چوک سے ٹریل تھری تک مارگلہ روڈ بھی بند رہے گی جبکہ ایکسپریس وے زیرو پوائنٹ سے کورال چوک تک ہر قسم کی ٹریفک کے لیے بند رہے گی۔

گیارہ سے بارہ اپریل تک اسلام آباد میں ہیوی ٹریفک کا داخلہ مکمل طور پر بند رہے گا۔ شہریوں کو متبادل راستے اختیار کرنے کی ہدایت جاری کی گئی ہے۔

جی ٹی روڈ پشاور سے راولپنڈی آنے والی ٹریفک کو ٹیکسلا موٹروے، چکری، چک بیلی روڈ اور روات روڈ استعمال کرنے کی ہدایت دی گئی ہے جبکہ لاہور سے پشاور جانے والی ٹریفک کو بھی انہی متبادل راستوں پر موڑ دیا گیا ہے۔

فیصل ایونیو سے زیرو پوائنٹ جانے والی ٹریفک کو نواں ایونیو کی طرف موڑ دیا جائے گا جبکہ بھارہ کہو سے راولپنڈی آنے جانے والے شہری کورنگ روڈ، بنی گالہ، لہتراڑ روڈ اور جی ٹی روڈ استعمال کریں گے۔

پشاور سے لاہور جانے والی ٹریفک ٹیکسلا موٹروے اور ترنول پھاٹک سے فتح جنگ موٹروے استعمال کرے گی جبکہ لاہور جی ٹی روڈ سے اسلام آباد آنے والی ہیوی ٹریفک کو چک بیلی روڈ سے چکری موٹروے استعمال کرنے کی ہدایت دی گئی ہے۔