اسلام آباد مذاکرات: دارالحکومت میں سیکیورٹی ہائی الرٹ، ریڈ زون سیل اور ٹریفک کا خصوصی پلان جاری

اسلام آباد میں ایران امریکا مذاکرات پر سیکیورٹی کے انتہائی سخت انتظامات کیے گئے ہیں۔۔۔ غیر ملکی وفود کی آمد پر ریڈ زون کو مکمل سیل کیا گیا ہے۔۔ ٹریفک پولیس نے آج اور کل کے لیے خصوصی ڈائیورژن پلان جاری کیا ہے۔۔ ٹریفک پولیس کے مطابق وفاقی دارالحکومت میں بھاری ٹریفک کا داخلہ مکمل طور پر بند ہے۔۔ جی ٹی روڈ پشاور سے راولپنڈی کے لیے ٹریفک کو ٹیکسلا موٹروے پر موڑ دیا گیا ہے۔۔ لاہور سے پشاور جانے والی ٹریفک روات، چک بیلی، چکری اور ٹیکسلا موٹروے کا راستہ استعمال کر رہی ہے۔ بھارہ کہو سے راولپنڈی جانے والے مسافروں کو کورنگ روڈ، بنی گالہ، لہتراڑ روڈ اور جی ٹی روڈ استعمال کرنے کی ہدایت کی گئی ہے۔ راولپنڈی سے اسلام آباد آنے والے شہری صدر سے نائنتھ ایونیو کا راستہ اپنائیں۔ لاہور جی ٹی روڈ سے آنے والی ہیوی ٹریفک کو چک بیلی روڈ سے چکری موٹروے کی طرف بھیجا جارہا ہے۔۔ وزارت داخلہ میں قائم کنٹرول روم سے نگرانی کی جا رہی ہے۔۔ شہر کی فضائی نگرانی بھی کی جارہی ہے۔۔ اسلام آباد کے داخلی و خارجی راستوں پر چیکنگ کو مزید موثر بنانے کے لیے خصوصی پوائنٹس قائم کیے گئے ہیں۔۔ پاک فوج، رینجرز، پولیس سمیت دیگر قانون نافذ کرنے والے ادارے سیکیورٹی پر مامور ہیں۔