چند اہم اختلافات کے باعث ایران امریکا معاہدہ نہ ہو سکا، کئی نکات پر اتفاق ہوا تھا: ایرانی وزارت خارجہ

ایران کی وزارت خارجہ کے ترجمان اسماعیل بقائی نے کہا ہے کہ امریکا اور ایران کے درمیان مذاکرات میں کئی امور پر اتفاق ہو گیا تھا، تاہم دو سے تین اہم معاملات پر اختلافات کے باعث حتمی معاہدہ ممکن نہ ہو سکا۔

تہران میں جاری بیان میں ترجمان نے بتایا کہ دونوں ممالک کے درمیان ہونے والا حالیہ مذاکراتی دور گزشتہ ایک سال میں سب سے طویل رہا، جو تقریباً 24 سے 25 گھنٹے تک جاری رہا۔

انہوں نے کہا کہ اگرچہ بعض نکات پر پیش رفت ہوئی، تاہم چند اہم ایشوز پر اختلاف برقرار رہا جس کے باعث ڈیل طے نہ ہو سکی۔ ترجمان کے مطابق دیگر کئی معاملات پر بھی دونوں فریقوں کے درمیان نقطہ نظر میں فرق موجود ہے۔

اسماعیل بقائی نے واضح کیا کہ سفارت کاری ایک مسلسل عمل ہے اور یہ قومی مفادات کے تحفظ کا اہم ذریعہ ہوتی ہے، اس لیے یہ توقع نہیں رکھنی چاہیے تھی کہ ایک ہی نشست میں معاہدہ طے پا جائے گا۔

انہوں نے مزید کہا کہ ایران خطے میں پاکستان اور دیگر دوست ممالک کے ساتھ رابطے میں رہے گا اور پاکستان کے کردار کو سراہتے ہوئے حکومت، عوام اور وزیراعظم شہباز شریف کا شکریہ ادا کیا۔