4ماہ بعد عمران خان سے ملاقات ہوئی،  آنکھوں میں تکلیف برقرار جبکہ بینائی متاثر ہے، سلمان صفدر

اسلام آباد ہائی کورٹ کے احکامات کی تعمیل کرتے ہوئے اڈیالہ جیل انتظامیہ نے چار ماہ بعد آج سہ پہر تین بجے عمران خان سے ملاقات کی سہولت فراہم کی۔

ذرائع کے مطابق ملاقات تقریباً ساٹھ منٹ جاری رہی، جس کے دوران عمران خان کو تمام قانونی معاملات، خاص طور پر القادر ٹرسٹ کیس پر تفصیلی بریفنگ دی گئی۔

بیرسٹر سلمان صفدر کے مطابق عمران خان کی مجموعی صحت تسلی بخش ہے، وہ بلند حوصلے میں اور ماضی کی طرح غیر معمولی طور پر مضبوط نظر آئے۔ تاہم آنکھوں کی تکلیف برقرار ہے، جس کی وجہ سے بینائی متاثر ہے، اگرچہ معمولی بہتری دیکھنے میں آئی ہے اور مزید علاج آئندہ دو ہفتوں میں متوقع ہے۔

ملاقات کے دوران عمران خان نے القادر ٹرسٹ کیس کے حوالے سے واضح ہدایات جاری کیں اور ضمانت کی درخواستوں پر دلائل دینے اور میرٹ پر فیصلہ لینے پر زور دیا۔