جوڈیشل کمیشن، اسلام آباد ہائیکورٹ کے جسٹس کیانی،جسٹس بابر،جسٹس ثمن کے تبادلوں کی منظوری

چیف جسٹس آف پاکستان جسٹس یحییٰ آفریدی کی زیرصدارت جوڈیشل کمیشن آف پاکستان کے اجلاس میں ہائیکورٹ کورٹ کے تین ججز کے تبادلوں کی منظوری دے دی گئی۔

جسٹس محسن اختر کیانی کا اسلام آباد ہائی کورٹ سے لاہور ہائی کورٹ تبادلہ اکثریت سے منظورکرلیاگیاجبکہ جسٹس بابر ستار کے اسلام آباد ہائی کورٹ سے پشاور ہائی کورٹ تبادلے کی بھی اکثریت سے منظوری دی گئی۔جسٹس سمن رفعت امتیاز کا اسلام آباد ہائی کورٹ سے سندھ ہائی کورٹ تبادلہ اکثریت سے منظورکیاگیا۔

اجلاس کے بعدجاری اعلامیے کے مطابق اجلاس مختلف سیشنز میں منعقد ہوا، جن میں اسلام آباد ہائی کورٹ کے ججز کے تبادلوں پر غور کیا گیا۔اعلامیے کے مطابق جسٹس ارباب ایم طاہر کے بلوچستان ہائی کورٹ تبادلے کی تجویز واپس لے لی گئی اسی طرح جسٹس خادم حسین سومرو کے سندھ ہائی کورٹ تبادلے کی تجویز بھی واپس لے لی گئی۔

چیئرمین کی جانب سے ایک تہائی اراکین کی ریکوزیشن پر اجلاس بلانے سے معذرت کے بعد سیکریٹری نے اختیار استعمال کرتے ہوئے اجلاس طلب کیاتھا۔متعلقہ ہائی کورٹس کے چیف جسٹس صاحبان نے ہر کیس میں بطور رکن شرکت کی اورہر جج کے تبادلے پر علیحدہ علیحدہ غور کیا گیا

کمیشن نے اکثریت سے فیصلہ کیا کہ ججز کے تبادلوں سے پیدا ہونے والی خالی نشستیں صرف ٹرانسفر کے ذریعے پُر کی جائیں گی۔ ایسی خالی آسامیوں کو نئی تقرری کے لیے اوپن نہیں کیا جائے گا۔اعلامیےمیں کہاگیاہے کہ ان فیصلوں کامقصد ہائی کورٹس کے درمیان ججز کی تعیناتی میں توازن برقرار رکھنا اور نظام کو مؤثر بنانا قرار دیا گیا۔